Irakta rekordtyq aptap ystyqtan elektr júıesi isten shyqty

ASTANA. KAZINFORM — Dúısenbi kúni Iraktyń búkil elektr energııasy júıesi anomaldi ystyq pen elektr tutynýdyń kúrt ósýine baılanysty isten shyqty, dep habarlaıdy Kazinform tilshisi. 

Irak Elektr energetıka mınıstrliginiń málimetinshe, elektrdiń óshýi Babıl men Kerbela provıntsııalarynda shamadan tys júktemege túsken eki elektr jetkizý jelisiniń toqtap qalýynan keıin bolǵan. Bul óńirlerge «Arbaın» atty shıızmdegi dinı rásimge qatysý úshin mıllıondaǵan qajylar kelgen edi.

Apat saldarynan 6 myń megavattan astam qýat kenetten joǵaldy jáne birqatar elektr stantsııalary toqtap qaldy.

Vedomstvonyń aqparatyna sáıkes, bul jaǵdaı eldiń kópshilik aımaǵyna áser etken, tek Irak Kúrdistany avtonomııasynda ǵana sónbegen. Onda energetıka sektoryn jańǵyrtý nátıjesinde halyqtyń shamamen úshten birine táýlik boıy elektr berý múmkindigi bar. Dúısenbi keshine qaraı Dı-Kar men Mısannyń ońtústik provıntsııalarynda elektr berý kezeń-kezeńmen qalpyna keltirile bastady.

Aýa raıy qyzmetiniń boljamynsha, keıbir óńirlerde 50°C-qa deıin jetken aptap ystyq bir aptadan astam ýaqyt saqtalady. Vedomstvo ókili Amer ál-Djaberı Iraktaǵy aptap tolqyndary ótken ǵasyrǵa qaraǵanda «neǵurlym qarqyndy ári jıi» bolyp ketkenin atap ótip, oǵan klımattyń ózgerýi men adam faktoryn sebep retinde keltirdi.

Onyń aıtýynsha, elde turǵyndardyń basym bóligi paıdalanatyn jeke generatorlardan shyǵatyn gaz da temperatýranyń ósýine yqpal etedi.

OPEK-tiń munaı óndirý kólemi boıynsha ekinshi iri eli sanalatyn Irak jazda elektr energııasynyń sozylmaly tapshylyǵyn sezinedi. Bul kezeńde turaqty jumys isteý úshin elge shamamen 55 myń megavatt qajet, alaıda bıylǵy aıda energetıka júıesi alǵash ret tek 28 myń megavatt óndiris deńgeıine jete aldy.

Seısenbi kúni Irak Elektr energetıka mınıstri Zııad Alı Fadel Basra, astana Baǵdad, sondaı-aq ońtústik jáne ortalyq Iraktyń kópshilik qalalaryn qamtyǵan ulttyq deńgeıdegi elektr sóný faktisi boıynsha tergeý júrgizetin arnaıy komıssııa qurýǵa tapsyrma berdi.

Turǵyndardyń aıtýynsha, jeke generatorlar jumys istep tursa da, úılerdi tolyqqandy salqyndatý múmkin bolmaı otyr.

Irak elektr energııasynyń tapshylyǵyn energııa júıesindegi joǵary júkteme, shekteýli óndiristik qýat jáne tabıǵı gaz ımportyna táýeldilik saldarynan sezinip otyr. Bılik halyqty elektrdi únemdeýge jáne eń kóp tutyný saǵattarynda qýaty joǵary turmystyq tehnıkany paıdalanýdy shekteýge shaqyrdy.

Buǵan deıin Shveıtsarııada da ekstremaldy ystyqqa baılanysty atom elektr stantsııasy toqtatylǵan edi.