«Irak ıslam qarsylyǵy» qozǵalysy Izraıldiń ómirlik mańyzdy nysanyna shabýyl jasaǵanyn málimdedi
ASTANA. KAZINFORM – «Irak ıslam qarsylyǵy» qozǵalysyna kiretin shııtter ushqyshsyz ushý apparatynyń kómegimen Izraıldiń soltústigindegi «ómirlik mańyzdy» nysanǵa shabýyl jasady, dep habarlaıdy Kazinform TASS agenttigine silteme jasap.
«Okkýpatsııaǵa qarsylyq kórsetý jolyn jalǵastyryp, Palestına men Lıvan halqyn qoldaý maqsatynda, sondaı-aq basqynshy bıliktiń beıbit halyqty, onyń ishinde balalardy, áıelderdi jáne qarttardy qyrǵanyna jaýap retinde, «Irak ıslam qarsylyǵynyń» modjahedteri jeksenbi 27 qazanda, Golan jotasynyń okkýpatsııalanǵan aımaǵyndaǵy ómirlik mańyzdy nysanaǵa ushqyssyz apparattar arqyly soqqy berdi. Islam qarsylyq qozǵalysy qarsylastyń tirek pýnktterin joıý operatsııalarynyń qarqyny arta túsetinin rastaıdy», - delingen Telegram-arnadaǵy málimdemede.
2023 jyldyń qazan aıynda HAMAS radıkaldy palestınalyq qozǵalysynyń sodyrlary Gazadan Izraıl aýmaǵyna enip, shekaralas eldi meken turǵyndaryn óltirip, tutqyndardy qolǵa túsirýine baılanysty óńirdegi jaǵdaı ýshyǵyp ketken soń, Iraktaǵy shııttik toptar belsendiligin arttyrdy. Radıkaldar bul shabýyldy Ierýsalımdegi ál-Aqsa meshitine qarsy Izraıl bıliginiń áreketine jaýap dep atady. Izraıl Gazany tolyqtaı qorshaýǵa alyp, oǵan jáne Lıvan men Sırııanyń keıbir aýdandaryna soqqylar jasaı bastady, keıin anklavta jerústi operatsııasyn bastady. Qaqtyǵystar Iordan ózeniniń Batys jaǵalaýynda da júrip jatyr.
Buǵan deıin Izraıl qorǵanys kúshteri ırandyq áskerı nysandarǵa túngi áýe shabýyldaryn aıaqtaǵanyn aıtyp, Irandy qaqtyǵystyń odan ári shıelenisýine qarsy turýǵa daıyndalýdy eskertken.
Esterińizge sala keteıik, 25 qazannan 26 qazanǵa qaraǵan túni ISD «rejımniń Izraılge qarsy úzdiksiz shabýyldary» dep ataǵan áreketine jaýap retinde «Irandaǵy áskerı nysandarǵa dál soqqylar jasap jatqanyn» málimdedi.
Izraıl áskeriniń Iranǵa jaýaby Tegeran 1 qazanda Izraılge jappaı shabýyl jasap, 200-ge jýyq ballıstıkalyq zymyranmen atýdan keıin kútilgen bolatyn. Bul óz kezeginde Iran qoldaıtyn lıvandyq shııttik «Hezbolla» tobynyń jetekshisi Hasan Nasrallanyń óltirilýine jaýap retinde jasaldy. Ol ızraıldikterdiń Beırýttegi Hezbollanyń shtab-páterine jasaǵan soqqysynan qaza tapty.
Iran aqparat quraldary 26 qazanǵa qaraǵan túni Tegeranda jáne oǵan jaqyn ornalasqan áskerı bazalarda eki saǵattan astam ýaqyt boıy birneshe jarylystyń eki tolqyny bolǵanyn habarlady. IRNA memlekettik aqparat agenttiginiń (QazAqparatqa seriktes agenttik) habarlaýynsha, Tegerannyń ortalyǵynda zenıttik atys estildi.
