Irak azamattyq áýe keńistigine salynǵan tyıymdy uzartpady

ASTANA. KAZINFORM - Iraktyń avıatsııalyq bıligi 13 maýsymnan beri qoldanysta bolǵan azamattyq ushaqtardyń el aýmaǵy ústinen ushýyna tyıymdy uzartpady, dep habarlaıdy TASS.

— 13 maýsym túninde engizilgen tyıym endi uzartylǵan joq, — dedi agenttikke suhbat bergen dıspetcher.

Onyń aıtýynsha, jaqynda el aýmaǵy arqyly Kýveıtten úshinshi elderge baǵyt alǵan birneshe tranzıttik ushaq ótken.

Dıspetcherlik qyzmet qazirgi ýaqytta Baǵdad halyqaralyq áýejaıynyń tolyq jumysyn qaıta qashan bastaıtyny týraly naqty aqparat joq ekenin de málimdedi.

Buǵan deıin Flightradar monıtorıngtik veb-servısi Irak áýe keńistiginiń ashylǵanyn habarlaǵan. Sondaı-aq Turkish Airlines kompanııasynyń baspasóz hatshysy Bılıal Ekshı áleýmettik jelidegi jazbasynda 25 maýsymnan bastap Baǵdad pen Erbıl baǵyttaryna reısterdiń qaıta jandanatynyn aıtqan.

Eske sala ketsek, 13 maýsymǵa qaraǵan túni Izraıl Iranǵa qarsy áskerı operatsııa bastaǵan bolatyn. Arada bir táýlik ótpeı Iran da jaýap shabýyl jasady. 23 maýsymda AQSh prezıdenti Donald Tramp Izraıl men Irannyń atysty tolyq toqtatýǵa kelisim bergenin málimdedi.

Izraıl bıligi AQSh usynysyn qabyldaǵanyn jáne alǵa qoıylǵan áskerı maqsattar oryndalǵanyn habarlady. Iran jaǵy Izraıldi birjaqty túrde agressııany toqtatýǵa májbúrlegenin aıtyp, bul qaqtyǵystaǵy jeńisin jarııalady.

Iraktyń avıatsııalyq bıligi azamattyq avıatsııa úshin áýe keńistigin jaýyp tastaǵanymen, keıbir reısterge Basra qalasynyń áýejaıyna qonýǵa ruqsat berilgen. Bul úshin dıspetcherler Parsy shyǵanaǵy jaǵynan el shekarasynan ótýge arnalǵan eki áýe dálizi men eki baqylaý núktesin anyqtaǵan. Mundaı reıster 24 maýsym kúni de oryndaldy.

Aıta ketelik Masýd Pezeshkıan Izraıl bitim shartyn saqtasa, Iran da ony buzbaıtynyn aıtqan edi.