Ipotekalyq baǵdarlama kóp, tıimdisi qaısy
ASTANA. KAZINFORM — Páterdiń tolyq qunyn qalta kótermegen jaǵdaıda kópshilik túrli ıpotekalyq baǵdarlamany paıdalanady. Osy oraıda, turǵyn úı naryǵy boıynsha sarapshy maman Aqerke Bodaýbekqyzy baǵdarlamanyń bárimen tolyq tanyspaı, sheshim qabyldamaý kerektigin aıtady.
– Barlyq ıpotekalyq baǵdarlama týraly bilip júrý kerek. Sebebi kóptegen adam qandaıda bir baǵdarlama bastalǵanda emotsııaǵa berilip jatady. Eger tym atyshýly, tanymal baǵdarlama boıynsha kópshilikpen birge úı alar bolsańyzdar, qymbatshylyqqa urynyp qalýlaryńyz múmkin. Árbir azamat aldyn ala barlyq ıpotekalyq baǵdarlamany qarap, salystyryp, saraptap, sodan keıin baryp tańdasa, anaǵurlym jeńil bolary anyq, – dedi ol Jibek Joly arnasynyń «Búgin LIVE» baǵdarlamasynda.
Sarapshy naryqtaǵy tıimdi ıpotekalyq baǵdarlamalardy da atap ótti.
– Búgingi tańda 7-20-25-tiń aı saıynǵy tólemderi ǵana qoljetimdi bolyp tur. Biraq merzimi uzaqtaý. 25 jylǵa alasyz. Dese de, qazir jaldamaly páterde turyp jatqan qanshama otbasy bar. Árıne, ol kisilerge bireýdiń páterine 140-150 myń tólegenshe, osy aqshany óz páterine quıǵany artyq. Bul men aıtqandaı ońaı bolmaıdy. Óıtkeni ol jerde alǵashqy jarna bar. Odan bólek qurylys máselesi taǵy bar. Qurylys jumystaryna kóp azamat 3-4 mln tg ketetinin aıtady. Bul aqshaǵa jasalǵan qurylys jumystary sizdiń kóńilińizden shyǵa ma degen másele bar. Bul - eshqandaı tehnıkany qospaǵandaǵy soma. Budan basqa, úı kezeginde turatyn azamattarǵa arnalǵan 2-10-20, 5-10-20 baǵdarlamalarynyń aı saıynǵy tólemi az shyǵady, – deıdi Aqerke Bodaýbekqyzy.
Ipotekalyq baǵdarlamalardy zerttep júrgen maman keıingi jyldary páter baǵasynyń edáýir kóterilgenin aıtady.
– Bir jyl buryn qurylysy tolyq aıaqtalǵan úılerdi 30-33 mln teńgege tabýǵa bolatyn edi. Tipti bul aqshaǵa dızaınerlik jóndeý jasalǵan 2 bólmeli páter alýǵa bolatyn. Al qazir mundaı jańa úıler 40-45 mln teńgege deıin barady. Páterlerge suranys bar bolsa, baǵa da óse beredi. Al suranystyń artýyna nápaqa tabý maqsatynda syrt jaqtan kelip jatqan azamattardyń kóp bolýy sebep. Mundaı qarqynmen páter baǵasynyń tómendeýi ekitalaı. Baǵa tek apatty, tótenshe jaǵdaılarda ǵana tómendeıdi, – deıdi sarapshy.
Sarapshy óziniń páter alýdaǵy laıfhaktarymen de bólisti.
– Men ózim «Otbasy banktiń» 50/50 baǵdarlamasymen páter aldym. Sebebi mende 50 paıyz jarna quıatyn jınalǵan aqsham boldy. Aqshany jınaý úshin artyq shyǵyndy tyıý kerek. Qonaqty kóp kútýden bas tartqan jón. Aqshany kerek emes zattar men azyq-túlikke jumsamaı qoıa turý qajet. Aıyna 1000 teńge bolsa da, 10 000 teńge bolsa da jınap otyrý kerek. Tıyn teńgeden quralady. Osyny jaqsy túsinse, adamdar ol aqshany kerek emes zatqa jumsaǵansha, jınaýǵa kirisedi, – deıdi ol.
Aıta keteıik, elimizde taǵy bir ıpotekalyq baǵdarlama iske qosyldy. Baǵdarlama týraly tolyǵyraq myna jerden bile alasyz.