iPhone-nyń baǵasy úsh esege qymbattaýy múmkin

ASTANA. KAZINFORM — iPhone AQSh-ta qurastyrylatyn bolsa, baǵasy 3500 AQSh dollaryna deıin sharyqtaýy yqtımal. Bul týraly CNN-ge silteme jasap Rozetked.me saıty jazdy.

Apple óte kúrdeli óndiris ekojúıesin qaıta qurýy kerek jáne bul úshin orasan zor aqsha salýy kerek.

CNN jazýynsha, AQSh Prezıdenti Donald Tramp «Jumys oryndary men zaýyttar qaıta oralady» dep málimdedi, óz sózinde álem boıynsha buryn-sońdy bolmaǵan tarıfter engizilgenin aıtyp ótti.

Endi onyń keń aýqymdy jahandyq tarıfteri kúshine engennen keıin, kıim-keshek pen elektronıka sııaqty ónimderdiń baǵasy qymbattaýy múmkin, jáne bul salmaq kóbine amerıkalyq tutynýshylarǵa túsetin bolady. Tehnologııa salasyndaǵy sarapshy, Wedbush Securities qarjy qyzmeti kompanııasynyń jahandyq tehnologııalyq zertteý jetekshisi Den Aıvs CNN-ge bergen suhbatynda, eger iPhone AQSh-ta óndirilse, onyń baǵasy shamamen 3500 AQSh dollaryna deıin kóterilýi múmkin ekenin eskertti.

Prezıdent pen onyń ekonomıkalyq qyzmetkerleri tarıfterdiń nátıjesinde kóptegen óndiristik jumys oryndary AQSh-qa qaıta oralady dep ýáde etti, bul mıllıondaǵan amerıkalyqty jumyspen qamtýy tıis.

Degenmen, Aıvs bul ıdeıany «qııaldaǵy ertegi» dep atady.

AQSh-ta jasalǵan iPhone qazirgi baǵasynan úsh ese qymbat bolýy múmkin dep atap ótti, sebebi Azııada bar kúrdeli óndiris ekojúıesin AQSh-ta qaıtalaý qajet bolady.

Aıvstyń aıtýynsha, AQSh-qa jetkizý tizbeginiń 10%-yn ǵana kóshirý Apple kompanııasyna shamamen 30 mıllıard dollarǵa túsedi ári buǵan úsh jyl ýaqyt kerek. Bul tek smartfondardy qurastyratyn zaýyttar salýmen shektelmeıdi, sonymen qatar chıpter óndirisine arnalǵan joǵary tehnologııalyq fabrıkalar da qajet bolady. Qazirgi ýaqytta bul óndiris TSMC kompanııasymen Taıvanda júrgiziledi. iPhone-nyń basqa quramdas bólikteri de shetelde óndiriledi. Mysaly, ekrandardy Ońtústik Koreıa kompanııalary óndirip otyr.

Eske sala keteıik, buǵan deıin Tramptyń tarıfteri Azııa men Eýropa naryǵynyń quldyraýyna sebep bolǵanyn jazǵan edik.