IOSCO qamqorlyǵymen «Investorlar kúni» ótti
Sharanyń ashylýynda sóz sóılegen AHQO Ákimshiligi basqarmasynyń múshesi, basqarýshy dırektory Ernur Rysmaǵambetov «Investorlar kúni» Qazaqstanda alǵash ret «Dúnıejúzilik ınvestorlar aptalyǵy-2018» aıasynda ótip otyrǵanyn aıtty.
«Astana» halyqaralyq qarjy ortalyǵy osy jyldyń 5 shildesinde iske qosylǵan bolatyn. Bul joba Qazaqstan Respýblıkasy Prezıdentiniń bastamasymen júzege asyrylýda. Sońǵy eki jylda biz AHQO aıasynda jumys istep turǵan barlyq jobalardyń ınstıtýttyq bazasyn, retteýshi bazasyn qalyptastyrý úshin barlyq negizderdi tolyqtaı qalap, jemisti jumys istedik", - dedi ol.
Sonymen qatar Ernur Rysmaǵambetov aǵymdaǵy AHQO-nyń qarjylyq qyzmetterdi retteý jónindegi komıtetiniń qurylǵanyn jáne ol AHQO janyndaǵy táýelsiz organ sanalatyndyǵyn, IOSCO-nyń qaýymdastyrylǵan múshesi ekendigin eske saldy.
«IOSCO-men yntymaqtastyq aıasynda biz Dúnıejúzilik ınvestorlar aptalyǵyn ótkizýdemiz. Shara osyndan sál erterek, 1 qazanda bastalǵan bolatyn. Osy ýaqyttyń ishinde biz 7 qalada, 15 ýnıversıtet pen 5 joǵary mektepte bolyp, olardyń stýdentterimen kezdestik. Saaparymyz barysynda tolyqtaı alǵanda 2,5 myńnan astam adammen júzdestik. Birqatar tsıfrlardy áli de jańartý ústindemiz. Sebebi eki úlken sharamyz Astana men Almaty qalasynda búgin ótip jatsa, keıbir sharalarymyz dúısenbiden sársenbige deıin ótetin bolady», - dedi ol.
Aıta keteıik, is-shara ınvestorlardyń múddelerin qorǵaý, qazaqstandyq mamandardyń biliktiligin arttyrý boıynsha ınvestıtsııalyq saýattylyqty damytýǵa baǵyttalǵan. Jıynǵa Ulybrıtanııa, Frantsııa, Avstralııa, Italııa elderiniń sarapshylary Qazaqstannyń qarjy naryǵyna qatysty taqyryptar boıynsha aqparattyq sessııalar, semınarlar ótkizdi. Aptalyq aıasynda AHQO-nyń kásiptik sertıfıkattar baǵdarlamasy tanystyryldy.
