Investıtsııalar úshin «ámbebap» yntalandyrý: Naqty qandaı jeńildikter engizilmek

ASTANA. KAZINFORM – Jańa Salyq kodeksiniń jobasynda ınvestıtsııalar úshin «ámbebap» yntalandyrý tetikteri qarastyrylǵan. Bul týraly QR UEM Salyq jáne keden saıasaty departamentiniń dırektory Erlan Saǵynaev málimdedi.

«Salyq tóleýshilerdiń barlyq sanattary úshin, sýbektıvtilik mólsherine qaramastan, ınvestıtsııalar úshin «ámbebap» yntalandyrýlar beriletin bolady. Ǵımarattardy, qurylystardy, mashınalardy, jabdyqtardy, fýnktsıonaldy maqsatyna silteme jasamaı baǵdarlamalyq qamtamasyz etýdi satyp alý jáne salý shyǵyndaryn 100% shegerý túrinde bir jolǵy ınvestıtsııalyq salyq preferentsııalary usynylady. Sondaı-aq, óz óndirisiniń ónimderin óndirý jáne satý úshin tabys salyǵynyń tómendetilgen mólsherlemesi usynylady», - dedi Erlan Saǵynaev Ulttyq kásipkerler palatasynyń sezdaldy jıynynda.

Departament basshysy shıkizatty qaıta óńdeý úshin QQS boıynsha yntalandyrý da beriletinin atap ótti.

«QR-da qaıta óńdeletin shıkizat pen materıaldardyń ımporty boıynsha QQS boıynsha 1 jylǵa deıingi merzimge keıinge qaldyrý usynylady. Standartty ınvestıtsııalyq kelisimsharttar, arnaıy ınvestıtsııalyq kelisimsharttar, kólik quraldary, aýyl sharýashylyǵy tehnıkasy, turmystyq tehnıka úshin QQS boıynsha jeńildikter saqtalatyn bolady. Ǵylymǵa ınvestıtsııalar úshin qosymsha yntalandyrý retinde ǵylymı ázirlemelerdi qarjylandyrýǵa arnalǵan 300% shyǵystar boıynsha «sýper shegerimder» usynylady», - dedi spıker.

Aıta keteıik, búgin Astanada Ulttyq kásipkerler palatasynyń sezdaldy jıyny ótti. Onda búkil óńirdiń jáne 200-deı bıznes qaýymdastyqtyń atynan 400-deı ókil qatysty.

Jıynda sońǵy birneshe aıda kásipkerlerden kelip túsken suraqtar talqylandy.

Jańa salyq kodeksi boıynsha tólemder sany 77-ge azaıtylyp, 6 alym túrin qysqartý qarastyrylǵanyn jazǵan edik.

Buǵan deıin Prezıdent jańa Salyq kodeksin qabyldaý merzimin kelesi jylǵa aýystyrýǵa bolatynyn aıtqan edi.