Interpol qazaqstandyq qyzdy Kambodjadaǵy eńbek quldyǵynan qutqaryp qaldy

ASTANA. KAZINFORM – Qazaqstan Іshki ister mınıstrliginiń Interpoly Kambodjaǵa jumysqa ornalasý maqsatynda barǵan qazaqstandyq azamatty eńbek quldyǵyna túsý qaýpinen qutqaryp qaldy, dep habarlaıdy Polisia.kz.

Qazaqstandyq qyz Kambodja Koroldigine qonaqúı ákimshisi qyzmetine jumysqa turý úshin ushyp barǵan. Alaıda barǵan soń jumys usynysynyń jalǵan ekeni anyqtalyp, ol eńbek quldyǵyna tartylý qaýpine tap bolǵan.

Oqıǵaǵa jedel den qoıǵan ІІM Interpoly Kambodjadaǵy Interpoldyń Ulttyq ortalyq bıýrosyna jáne Interpoldyń adam saýdasyna qarsy kúres tobyna resmı suranystar joldady. Sheteldik áriptestermen úılesimdi áreket nátıjesinde azamatsha der kezinde qutqarylyp, aman-esen Qazaqstanǵa qaıtaryldy.

Qazirgi ýaqytta qyzdy shetelge jumysqa ornalastyrý syltaýymen zańsyz eńbekke tartpaq bolǵan adamdardy anyqtaý jumystary júrgizilip jatyr. Olar zańnamaǵa sáıkes jaýapqa tartylatyn bolady.

ІІM málimetinshe, bul oqıǵa adam saýdasyna qarsy halyqaralyq yntymaqtastyqtyń tıimdiligin kórsetedi. Buǵan deıin Qazaqstan Іshki ister mınıstri Erjan Sadenov Interpoldyń Frantsııanyń Lıon qalasyndaǵy shtab-páterine jumys saparymen baryp, halyqaralyq qaýipsizdik máseleleri boıynsha kelissózder júrgizgen edi. Sondaı-aq Qazaqstan Interpoldyń adam saýdasyna qarsy «Lıberterra II» operatsııasyna qosylyp, Laosta erkinen tys ustalǵan taǵy bir qazaqstandyq qyzdy qutqardy.

ІІM sheteldegi «tartymdy» jumys usynystarynan saq bolýǵa shaqyrady. Azamattarǵa jumys berýshi týraly aqparatty resmı kózderden tekserip, saq bolý qajettigin eskertedi.