Internettegi býllıngtiń aldynda ata-ana da, ustaz da dármensiz – psıholog

ASTANA. KAZINFORM – Kıberbýllıngtiń saldary adam psıhıkasyna ǵana emes, densaýlyǵyna keri áser etedi. Osy oraıda ınternettegi býllıng týraly otbasylyq psıholog, psıhoterapevt Serikgúl Sálımen tildesken edik.

- Kıberbýllıngtiń shekarasy joq jáne ol psıhologııalyq turǵydan úzdiksiz áser etedi. Qazir eń qaýipti – kıberbýllıng. Osynyń kesirinen óz-ózine qol jumsap jatady nemese sozylmaly aýrýlarǵa shaldyǵyp qalýy múmkin, psıhologııalyq aýytqýlardyń nemese jaman ádetti qalyptastyrýy múmkin, óte qaýipti nárse. Býllıngke tap bolǵan bala kómek suraıdy, ata-anasyna aıtady, jaqyn, senetin bireýge aıtady, biraq ınternettegi býllıngtiń aldynda ata-ana da, ustazdar da dármensiz. Árbir mektep ınternettegi býllıngtiń aldynda álsizdik tanytady, sondyqtan balanyń ınternettegi akkaýntaryn jaýyp tastaıdy, ol da balaǵa keri áserin tıgizedi, bala alys-jaqyn dostaryn joǵaltady, estelik sátterin bólisip otyratyn, alýǵa tıis emotsııalaryn joǵaltady. Degenmen osy tásildi kóbirek qoldanyp jatady, - dedi Serikgúl Sálı suhbat barysynda.

Mamannyń aıtýynsha, áleýmettik jelidegi býllıngke shydamaı óz-ózine qol jumsaý máselesi eresekter arasynda da bar.

- Qysymdy eresekter kótere almaı jatqan kezde, balalar ony qaıdan kóteredi, - dep tolyqtyrdy psıholog.

Osyǵan deıin Memleket basshysy Qasym-Jomart Toqaev balalardy kıberbýllıngten qorǵaıtyn zańnamalyq mehanızmder engizilgenin atqan edi.