Internette balalar organdaryn satatyn top týraly vıdeo tarady

ASTANA. QazAqparat – Áleýmettik jelilerde eki bólikten turatyn vıdeorolık tarap jatyr. Birinshisinde jerde jatqan birneshe adamdy bireýler tepkiniń astyna alýda, ekinshisinde muz salynǵan konteınerde balanyń denesi jatyr. Jazylǵandaı, ustalǵan er adamdar – balalar organdaryn satatyn bandanyń músheleri, konteınerdegi bala – satý maqsatynda daıyndalǵan denelerdiń biri. Stopfake.kz vıdeonyń anyq-qanyǵyn anyqtap kórdi, dep habarlaıdy QazAqparat.

Anyqtalǵandaı, bul 2018 jyldan beri ártúrli sıpattamamen ınternette tarap kele jatqan eski vıdeolar.

«Vıdeonyń eki bóligin de tolyq qarastyraıyq. Birinshisinde jerde kıimmen jatqan eki adam kórsetilgen. Olardy basqa adamdar tepkilep jatyr. Olardyń kim ekendigi jáne olardy naqty ne úshin uryp jatqany belgisiz. JawaPos.com ındonezııalyq jańalyqtar portalynyń habarlaýynsha, rolıktiń keıipkerleri alaıaqtyq pen sapasyz taýardy satqany úshin osyndaı jazaǵa tartylǵan.
Balanyń denesiniń janynda jylap otyrǵan áıeldiń vıdeosy ınternette keńirek taralǵan. Ony alǵash ret 2017 jyldyń shildesinde qytaılyq qoldanýshy jarııalaǵan. Shyn máninde, bul bala týystaryna qonaqqa baryp, sýǵa batyp ketken. Onyń denesin jerleý úshin týǵan qalasyna jetkizý maqsatynda muz salynǵan konteınerge salǵan», - dep jazady Stopfake.kz.

Sondaı-aq organdardy transplantatsııalaý kúrdeli jáne muqııat retteletin protsess ekenin eskergen jón. Denesi muzdatylǵan qaıtys bolǵan donordan músheni transplantatsııalaý múmkin emes.

Osylaısha, taralǵan rolıkte organdarǵa satý maqsatynda balalardy urlaý áreketi kórsetilmegen. Bul bir-birimen baılanysty emes eki túrli vıdeo: birinshisi alaıaqtardy jazalaý, ekinshisi sýǵa batyp ketken balanyń denesin tasymaldaý týraly.