Internet sapasy úshin operatorlarǵa 1,7 mlrd teńge aıyppul salyndy
«Meniń bastamammen 2021 jyly sapasyz ınternet úshin aıyppul mólsheri kóbeıtildi. Dál osy aıyppuldardy kóbeıtý, osy norma bizge kómektesti, ıaǵnı ótken jyly biz óńirlerge 1 175 ret saparlap, jalpy somasy 1,7 mlrd teńgege aıyppul tirkedik. Buǵan deıingi barlyq jyldarda mundaı soma aıyppul retinde eseptelmegen. Shalǵaı óńirlerge saparlar on ese az bolatyn, aıyppuldar jylyna 100 mln teńgege de jetpeıtin. Qazir biz baılanys sapasyn baqylaýdy kúsheıttik, ınternetpen qamtý statıstıkasy túzetildi», - dedi Tsıfrlyq damý mınıstri Jibek Joly telearnasynyń efırinde.
Mınıstrdiń aıtýynsha, aıyppuldar óte tómen bolǵanda baılanys operatorlary sapaǵa nazar aýdarmady, óıtkeni 30 myń teńge tóleý ońaıǵa túsetin. Bul soma shalǵaı aýyldarǵa baryp tekserýdi de aqtamaıtyn.
«Bıyl operatorlardyń kerisinshe áreket ete bastaǵanyn kórip otyrmyz. Sebebi, Premer-Mınıstr tapsyrmasymen ınternet sapasyn baqylaý kúsheıedi, 1,7 mlrd teńge aıyppul 3-5 mlrd teńgege jetýi múmkin. Operatorlarǵa mundaı qarajatty aıyppulǵa bergenshe, ınfraqurylymǵa ınvestıtsııalaǵany tıimdirek bolady.
Ekinshiden, biz salaǵa ınvestıtsııa jasaǵan operatorlarǵa qoldaý kórsetemiz, salyq tóleýde jeńildik jasaımyz. Operator zań boıynsha paıdalanylatyn radıojıilik úshin salyq tóleýge mindetti. Eger ol ınfraqurylymǵa ınvestıtsııa salsa, bul somaǵa aldyn ala jeńildik jasalady. Osylaısha, salyqqa tóleıtin qarajatty aýyldyq jerlerdiń baılanys sapasyn jaqsartýǵa jumsaı alady. Jalpy, pandemııadan keıin barlyq úkimetter respýblıkalyq bıýdjet esebinen baılanys ınfraqurylymyna memleket tarapynan ınvestıtsııa salý jóninde ulttyq jobalardy qolǵa ala bastady. Bul – jaqsy úrdis», - dedi Baǵdat Mýsın.
Aıta keteıik, búgin Úkimet otyrysynda el turǵyndaryn sapaly ınternetpen qamtý máseleleri qaraldy.
Buǵan deıin mınıstr spýtnıktik jeliler arqyly baılanys ornatylǵan eldi mekenderdi jalpy statıstıkadan alyp tastaǵanyn aıtqan edi.
