Internet baıaý isteıtin aýyldardy statıstıkadan shyǵardyq - Baǵdat Mýsın

ASTANA. QazAqparat – Qazaqstandaǵy ınternetpen qamtý týraly statıstıka edáýir tómendetildi. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

«Qazirgi ýaqytta biz óńirlerge revızııa júrgizip, spýtnıktik jeliler arqyly baılanys ornatylǵan eldi mekenderdi jalpy statıstıkadan alyp tastadyq. Sebebi, onda ınternet qaǵaz júzinde bar, is júzinde adamdar ony paıdalana almaıdy. Internet óte baıaý, tipti jańalyqtar lentasynyń ózi birneshe saǵat boıy júkteledi. Sondyqtan, statıstıkany durystap, eldi mekenge jetkizilgen ınternet sapasynyń belgili bir standarttaryn bekittik», - dedi mınıstr Jibek Joly telearnasynyń efırinde.

Osylaısha, Qazaqstan eldi mekenderin ınternetpen qamtý statıstıkasy birshama tómendegen.

«Bizde myńdaǵan aýyldyń ınternetke qosylǵany týraly jaqsy statıstıka boldy. Biraq, sol aýyldar turǵyndarynyń ınternet sapasyna aryz-shaǵymy da qatar túsip jatty. Sondyqtan, baılanys sapasyn tekserý úshin shalǵaı aýyldarǵa saparlap jatyrmyz, operatorlar baılanys bar dep esep bergenimen, shyn máninde jaǵdaı múshkil ekenin kórdik. Osylaısha, statıstıkalyq aqparatty ózektendirip, jetkilikti túrde shyndyqqa janastyrdyq», - deıdi Baǵdat Mýsın.

Aıta keteıik, búgin Úkimet otyrysynda el turǵyndaryn sapaly ınternetpen qamtý máseleleri qaraldy.