Internet arqyly tamaq aldyrǵanda neni eskerý kerek
- tapsyrys bermes buryn saıttan myna aqparatty tabyńyz: fırmalyq ataýy, ornalasqan jeri (tamaq daıyndalatyn statsıonarlyq obektiniń mekenjaıy) jáne jumys rejımi. Usynylatyn tamaq ónimderi týraly aqparat mańyzdy, ol da saıtta jarııalanýy tıis.
- chekti (satýshynyń mekenjaıymen) elektrondy poshtaǵa nemese telefonǵa alǵanyńyzdy naqtylaý úshin tólemdi jeke tulǵalarǵa aýdarmańyz.
- taǵamnyń ataýy, jaramdylyq merzimi jáne qaptamadaǵy quramy kórsetilgen be, joq pa - soǵan nazar aýdaryńyz. Sondaı-aq ónimniń salmaǵy (kólemi) men onyń taǵamdyq qundylyǵyna mán bergen jón. Ónimde daıyndalǵan kúni men saǵaty, jaramdylyq merzimi jáne saqtaý sharttary, tamaq ónimderin daıyndaýshynyń ataýy jáne ornalasqan jeri nemese tamaq ónimderin daıyndaýshy jeke kásipkerdiń tegi, aty, ákesiniń aty jáne ornalasqan jeri, tapsyrys berýshige daıyndaý boıynsha usynymdar (qajet bolǵan jaǵdaıda) kórsetilýi tıis.
- ınternet arqyly aldyrǵan tamaqty tutynar aldynda qaptamanyń ashylmaǵanyna kóz jetkizip, kózge kórinip turǵan búliný bar-joǵyn tekserińiz. Tamaqtanar aldynda qolyńyzdy jýyńyz.
- azyq-túlik ónimderin jaramdylyq merzimin eskere otyryp saqtańyz, merzimi ótken zattardy tastańyz.
- kúmándi saıttar arqyly kezdeısoq adamdardan úıde daıyndalǵan ónimderdi, tort satyp almańyz.
«Azyq-túlikti durys daıyndamaý nemese tamaqty durys saqtamaý arqyly beriletin 200-den astam aýrý bar. Kez kelgen tamaqtan ýlanýdyń tikeleı sebepteri - sanıtarlyq normalardy saqtamaý nemese quramynda patogender men ýly zat bar taǵamdardy jeý. Bul aýrýlar jappaı juǵyp, sondaı-aq jeke jaǵdaılarda da paıda bolýy múmkin. Tamaqtan ýlaný kenetten bastalady, adamnyń jaǵdaıy tez nasharlaıdy. Ýlaný kóbine quramynda zııandy zat bar taǵamdy tutynǵanda bolady. Ýlaný belgileri bolǵan kezde aldymen asqazandy shaıý kerek. Dereý dáriger kómegine júginip, eshqandaı jaǵdaıda ózińdi-óziń emdemegen jón. Óıtkeni bul sizdiń ómirińizge qaýip tóndirýi múmkin» dep eskertedi sanıtar dárigerler.
