Internet arqyly saýda jasaǵan petropavldyq 1 mln teńgege jýyq aqshasynan aıyryldy
Soltústik Qazaqstan oblysy polıtsııa departamenti baspasóz qyzmetiniń málimetinshe, bıyl sáýir aıynda Petropavl turǵyny polıtsııaǵa aryzdanyp, óziniń ınternet-alaıaqqa aldanǵanyn aıtqan.
Ol Instagram áleýmettik jelisindegi pablıkterdiń birinde habarlandyrýdy kórip, kóterme baǵamen balalar kıimin almaqshy bolady.
Áıel «satýshyǵa» 800 myńnan astam teńge aýdarady, keıin alaıaq baılanysqa shyqpaı qoıady.
Atalǵan fakti Sotqa deıingi tergep-tekserýdiń biryńǵaı tizilimine QR Qylmystyq kodeksiniń «Alaıaqtyq» baby boıynsha engizildi.
Jedel-izdestirý is-sharalary nátıjesinde tártip saqshylary qylmysqa Almaty oblysynyń 23 jastaǵy turǵynynyń qatysy baryn anyqtady.
Polıtseıler kúdiktini qyzmettik issapar barysynda ustady. Endi onyń basqa qylmystarǵa qatysy bar-joǵyn anyqtaý úshin materıaldar Almatyǵa jiberilmek.
«Adamdar ınternet arqyly zattardy satý jáne satyp alýda saq bola bastaǵanymen, aldyn ala tólem talap etýmen baılanysty alaıaqtyq áli kúnge deıin kezdesedi. Jelide usynylatyn taýar men qyzmetterdi tekserý, qosymsha foto, beıne materıaldardy talap etý qajettigin eskertemiz», - deıdi Petropavl qalalyq PB krımınaldyq polıtsııa bóliminiń bastyǵy Darhan Zııafıddın.
Polıtseılerdiń aıtýynsha, keń taralǵan alaıaqtyqtyń biri – «banktiń qaýipsizdik qyzmetinen» qońyraý shalý.
Adamdardy usynylǵan shotqa aqsha jiberýge nemese qupııasózderdi, bank kartasynyń syrt jaǵyndaǵy cvv-kodtaryn, esepshotqa qol jetkizýge múmkindik beretin basqa da qupııa aqparatty jiberýge kóndiredi.
«Taǵy bir tásil – qashyqtyqtan qol jetkizý qosymshasyn telefonǵa ornatý týraly usynys jasaý, bul qosymsha arqyly qylmyskerler uıaly telefonǵa, sáıkesinshe, barlyq shottarǵa qol jetkize alady. Bóten adamdardyń nusqaýymen belgisiz baǵdarlamalardy júktemeýge jáne paıdalanbaýǵa shaqyramyz. Sondaı-aq, kartanyń nómiri men cvv kod sııaqty qupııa málimetterdi talap etetin kúmándi siltemeler boıynsha ótpegen jón». , - deıdi Darhan Zııafıddın.
