Internet-alaıaqtardan qalaı qorǵaný kerek – qarapaıym keńes

NUR-SULTAN. QazAqparat – QR ІІM Krımınaldyq polıtsııa departamenti bastyǵynyń orynbasary Qanat Nurmaǵambetov ınternet-alaıaqtardan qorǵaný joldaryn aıtty, dep habarlaıdy QazAqparat tilshisi.

«Internet-alaıaqtyqtan qorǵanýdyń qarapaıym is-sharalaryna toqtalyp, birqatar usynys aıta keteıin. Ózińizdiń jeke málimetterińizdi, plastık kartańyzdyń rekvızıtterin eshkimge aıtpańyz. Aýdarymdar týraly túbirtekti, kodyńyz ben qupııa sózińizdi tipti bank qyzmetkerine de, polıtsııaǵa da bermeńiz. Belgisiz jáne tekserilmegen saıttarǵa jeke málimetterińizdi senip engizbeńiz. Tekserip almaı, tólem jasamańyz. Tólemdi taýar alǵannan keıin aýdarýǵa kelisýge tyrysyńyz», - dedi ol ІІM baspasóz alańynda ótken brıfıngide.

Onyń atap ótýinshe, kúdik týdyratyn mámilelerge aqsha aýdarmaý, tabys kózi belgisiz qarjylyq syzbalardan saq bolý kerek. Qosymshalardy ornatý barysynda App store men Play Market-tiń resmı derekkózderin qoldanǵan jón.

«Bankıng qyzmetterine kirýge arnalǵan qupııa sózdi únemi aýystyryp turý, 3D-qorǵanysty jáne bankter usynatyn ózge de qaýipsizdik is-sharalaryn qoldanyńyzdar. Óz esepshottaryńyzdy, aqsha qozǵalysyn únemi tekserip otyryńyz. Mundaı is-sharalar alaıaqtardan jaltarýǵa jáne aqshańyzdy saqtaýǵa múmkindik beredi», - dedi Qanat Nurmaǵambetov.