Instıtýt bitirýshi kýrsanttar 100 shaqyrymdyq áskerı joryqqa shyqty

NUR-SULTAN. QazAqparat - Qurlyq áskerleri Áskerı ınstıtýty bitirýshi kýrsynyń kýrsanttary ózderiniń mamandyqtary boıynsha dalalyq praktıkalyq sabaqtardan ótti, dep habarlaıdy QR Qorǵanys mınıstrliginiń baspasóz qyzmeti.

Bolashaq ofıtserler is júzinde alǵan teorııalyq bilimderin pysyqtap, áskerı tehnıkany basqara alý sheberlikterin pash etti jáne sý bógetterin urys mashınasymen eńserýdiń barlyq múmkindikterin zerdeledi.

Qurama ekıpajdar quramynda olar jaıaý áskerdiń jaýyngerlik mashınalary men T-72 tankterinde 100 shaqyrymdyq marsh jasady. Arnaıy ol úshin áskerı ınstıtýttyń oqý-jattyǵý ortalyǵynda kórsetilim sabaqtary uıymdastyryldy.

Kýrsanttar jaýyngerlik mashınalardy júrgizý, kúrdeli jaǵdaıda manevrleý, ártúrli kedergilerdi eńserýde tabandylyq pen batyldyqty pash etti.

«Marshty uıymdastyrý men ótkizýdi zerdeleý kezeń-kezeńimen ótedi. Birinshi kýrsta kýrsanttar bólimshe komandıriniń jumysy deńgeıinde, ekinshi jáne úshinshi kezeńde vzvod jáne rota komandıri deńgeıinde qajetti máselelerdi zerdeleıdi. Bolashaq ofıtserler 100 shaqyrymdyq marshty oqytýdyń sońǵy tórtinshi kýrsynda batalon komandıri aýqymynda ótkiziledi», - dedi Qurlyq áskerleri Áskerı ınstıtýty oqý bóliminiń bastyǵy podpolkovnık Jánibek Sarǵazın.

Praktıkalyq sabaqtar oqyp-úırenýshilerdiń taktıkalyq, atys jáne ádistemelik mashyǵyn arttyrýǵa yqpal etetinin, urysty uıymdastyrý men júrgizýdegi qabiletterin jetildiretinin aıta ketken jón. Kýrsanttar áskerlerge qyzmet etýge joǵary deńgeıdegi kásibı daıyndyqpen, ofıtserler úshin qajetti bilim jáne daǵdymen attanady.