Innovatsııalyq jobalar: jattyqtyrýshy robot, drondar jáne neırodýlyǵa týraly ne bilemiz
ASTANA. KAZINFORM – Jattyqtyrýshy robot ıt, san túrli jaǵdaıǵa qajetti drondar jáne neıro dýlyǵa - bul elimizde jasandy ıntellekt pen robototehnıka segmentinde jasalyp jatqan ozyq tehnologııalyq týyndylar. Bul týraly Jibek joly telearnasynyń jańalyqtar qyzmetinde aıtty.
Tyń jobalarlyq ónimder bos turmaıdy, bári de óndiris pen qaýipsizdikti nyǵaıtýǵa qoldanylyp jatyr. Sondaı-aq ǵarysh, medıtsına jáne quqyq salalarynda jańa múmkindikterge jol ashyp otyr.
Innovatsııalyq robottardyń qatarynda Kýka jattyqtyrǵyshy, robot ıt jáne túrli maqsattaǵy drondar bar. Bul qurylǵylar zamanaýı tehnologııalardy meńgerýge jáne tájirıbelik daǵdylardy damytýǵa múmkindik beredi.
Robot ıttiń 360 gradýsqa sholý jasaıtyn kamerasy, jylý vızory jáne gaz taldaǵyshy bar. Ol avtonomdy jáne qolmen basqarý rejımderinde jumys isteıdi. Baǵdarlamashylar búginde ony qazaqsha sóıletetin programma jazyp jatyr.
Taǵy bir ınnovatsııalyq joba — «Sýdıalarǵa arnalǵan smart-analıtıka». Jasandy ıntellekt pen Big Data tehnologııalaryna negizdelgen bul júıe sot úderisteriniń tıimdiligin arttyryp, ádil sheshim qabyldaýǵa septigin tıgizedi.
— Qazirgi jasandy ıntellekt júıeler ashylmaǵan, aıtylmaǵan kezeńde bastalǵan joba. Іshindegi qujattardy jasandy ıntellektiniń kómegimen analız jasap, sýdıalarǵa kómek kórmetedi. Adam mln qujatty bir ýaqytta kóre almaıdy, biraq júıe ony isteı alady. Mysaly mln qujattyń ornyna 10 qujatty iriktep, analız jasaýǵa yqpalyn tıgizedi, — deıdi baǵdarlamashy Babýr Mýhsınbaev.
Qazaqstanda ónerkásiptik qaýipsizdikti arttyrý maqsatynda ázirlenip jatqan ınnovatsııalyq jobalardyń taǵy biri — neırodýlyǵa. Bul qurylǵy sharshaý men kúızelisti erte anyqtap, óndiristik qatelerdi azaıtýǵa kómektesedi. Sondaı-aq, ony astronavttardyń kognıtıvti jaǵdaıyn zertteý úshin de qoldaný josparlanyp otyr.
— Astronavttardyń arasynda negizinen er adamdar kóp, al ǵaryshta áıelder óte az. Bizdiń maqsatymyz — alǵashqy qazaq áıelin ǵaryshqa daıyndaý. Bul joba Qazaqstannyń ǵarysh pen medıtsına salalaryndaǵy bedelin arttyryp, joǵary tehnologııaly jumys oryndaryn ashýǵa jáne ınvestıtsııa tartýǵa yqpal etedi, — dedi Aqparattyq tehnologııalar jáne ınjenerııa mektebiniń assıstent-professory Alına Gýtoreva.
Bul ınnovatsııalyq jobalar elimizdiń ǵylymı áleýetin álemge tanytyp, zamanaýı múmkindikter ashady. Olar elimizdiń ǵalamdyq básekege qabilettiligin arttyryp, jastardy yntalandyratyn qadamdarǵa shabyttandyratyny sózsiz.