Inflıatsııamen kúreste qandaı quraldar qoldanylady

Ulttyq bank tóraǵasy Tımýr Súleımenov ınflıatsııamen kúres josparymen bólisti, dep habarlaıdy Kazinform.

«Bazalyq mólsherlememen barynsha abaılap ilgerileımiz. Iá, ınflıatsııa tómendep keledi. Biraq, bul kóp jaǵdaıda ótken jyly bazalyq mólsherlemeniń tym joǵary bolýymen baılanysty. Óz-ózimizdi aldaýmen aınalyspaıtyndyǵymyz anyq. Ekonomıkamyzdy damytýdyń barlyq ekonomıkalyq, áleýmettik, qarjylyq jáne basqa da kórsetkishterin qarastyratyn bolamyz», - dedi Tımýr Súleımenov Ulttyq bankte ótken brıfıngte agenttik tilshisiniń saýalyna oraı.

Osy oraıda Ulttyq bank tóraǵasy ınflıatsııamen kúrestegi birinshi qural bazalyq mólsherleme bolatyndyǵyn basa aıtty.

«Ekinshisi – bul Úkimettegi jáne jergilikti atqarýshy organdardaǵy áriptesterimiz júrgizip jatqan jumys. Bul rette taýarlardyń jekelegen toby boıynsha naqty sheshimder qajet», - dedi ol.

Buǵan deıin vedomstvo basshysy elimizdegi ınflıatsııanyń yryqqa kóný belgisin ataǵan edi.