Inflıatsııany tejemegen ákim orynbasary Saǵyntaevtan sóz estidi

ASTANA. QazAqparat - Búgin Úkimettiń selektorlyq rejımdegi otyrysynda QR Premer-Mınıstri Baqytjan Saǵyntaev Atyraý oblysyndaǵy ınflıatsııany tejeý jumystaryna kóńili tolmaıtyndyǵyn ashyq aıtty, dep habarlaıdy QazAqparat.

«2017-2018 jyldardyń saqtandyrý qorlarynan óńirlik turaqtandyrý qoryna bıylǵy jyly 1255 tonna kartop jáne kókónis ónimderin satyp alýǵa sheshim qabyldanyp, aǵymdaǵy jyldyń qazan aıynda tasymaldaý josparlanyp otyr. Qazirgi tańda turaqtandyrý qorynda 575500 dana jumyrtqa ónimderi saqtalýda. Memorandým negizinde áleýmettik mańyzy bar azyq-túlik taýarlaryna tutyný baǵalary ındekstik  deńgeıde qazan aıynda 109 paıyz bolady dep boljanýda», - degen edi Atyraý oblysy ákiminiń orynbasary Álibek Naýtıev.

«Baıandamańyz jaqsy. Biraq ınflıatsııalyq eń joǵary 6 paıyzdyq kórsetkish Atyraý oblysynda. Sebebin nege aıtpadyńyz? Respýblıka boıynsha eń joǵary kórsetkishtiń sebebi nede?», - dep surady Úkimet basshysy Atyraý oblysy ákiminiń orynbasarynan.

Óz kezeginde Álibek Naýtıev Atyraý oblysyndaǵy ınflıatsııalyq kórsetkishtiń joǵary bolýyna dollar qunynyń artýyna baılanysty dep aqtalýǵa tyrysty.

«Dollar búkil Qazaqstan boıynsha birdeı ǵoı. Jaqsy jumys joq degen sóz», - dep túıindedi sózin Baqytjan Saǵyntaev.

Aıta keteıik, otyrysta Ulttyq ekonomıka mınıstri Tımýr Súleımenov jyldyń basynan beri óńirlerdiń kóbinde ınflıatsııa salystyrmaly tómen deńgeıde tirkelgenin aıtqan bolatyn

«5 óńirde ınflıatsııa ortasha respýblıkalyq deńgeıden joǵary qalyptasty. Olar: Atyraý, Soltústik Qazaqstan, Pavlodar, Ońtústik Qazaqstan oblystary jáne Astana qalasy», - degen edi Tımýr Súleımenov.

Eskertý: Buǵan deıin materıalda Atyraý oblysy ákimi orynbasarynyń esimi qate berilgen bolatyn. Qate túzetildi. Keshirim suraımyz.