Inflıatsııalyq boljamdar qyrkúıekte tómendedi - Danııar Aqyshev

ALMATY. QazAqparat - Inflıatsııa nysanaly dálizde tur. Al ınflıatsııalyq boljamdar ınflıatsııanyń baıaýlaýynan keıin turaqtamaq. Bul jóninde jýrnalısterge QR Ulttyq Bankiniń tóraǵasy Danııar Aqyshev búgin dástúrli baspasóz konferentsııasy barysynda aıtty, dep habarlaıdy QazAqparat tilshisi. 

Statıstıka komıtetiniń dereginshe, 2018 jylǵy qańtar-tamyzdaǵy ınflıatsııa 2,9% bolǵan. Ótken jylǵy osy kezeńde ınflıatsııa 3,9% edi. 

«Jyldyq ınflıatsııa, ıaǵnı 2017 jylǵy tamyzdan bastap osy jyldyń tamyzy aralyǵynda 6%-y qurady. 2018 jylǵa belgilengen dáliz ortasynda, ıaǵnı 5-7% boldy. Biz ınflıatsııanyń 2018 jyly nysanaly dálizde saqtalýyn kútemiz» - dedi D. Aqyshev.

Ol ınflıatsııanyń artýy jáne dáliz sheginen shyǵý yqtımaldyǵy 2019 jylǵa boljanǵanyn aıtty. Ol kezeńge ınflıatsııanyń neǵurlym tómen dálizi - 4-6% dep belgilengen.

«Dálizdiń 4%-dyq mánine birtindep tómendeýi - Ulttyq Banktiń orta merzimdi baǵdary. Bul 3 jyl buryn belgilengen bolatyn. Ulttyq Bank óz saıasatyn boljaýdy arttyrý jáne oǵan degen senimdi arttyrý úshin orta merzimdi baǵdardy qarastyrmaýdy durys dep sanaıdy», - dedi D. Aqyshev.

Bas bankır jyldyq ınflıatsııa deńgeıin 2020 jyldan keıin 4% mólsherine jetkizýge talpynatynyn aıtty. 

«Sondyqtan Ulttyq Bank ınflıatsııa boıynsha alǵa qoıylǵan maqsattarǵa jetý úshin aqsha-kredıt saıasatynyń barlyq quraldaryn paıdalanady. Bizdiń saýalnamalar halyqtyń bir jyl buryn baǵanyń kútiletin ósimin baǵalaýy osy jyldyń basyndaǵy 7,1%-dan tamyzdaǵy 5,9%-ǵa deıin tómendegenin kórsetip otyr», - dedi D. Aqyshev.