Inflıatsııa 1,3% baıaýlady

ASTANA. QazAqparat - 2023 jylǵy maýsymda ınflıatsııa bir jylda 14,6% qurady jáne 1,3% baıaýlady, dep habarlaıdy QazAqparat Ulttyq statıstıka bıýrosynyń málimetterine silteme jasap.

Ulttyq stastıtıka bıýrosynyń derekterinshe, baǵa azyq-túlik taýarlaryna bir jylda – 14,6% (2023 jylǵy mamyrda – 16,5%), azyq-túlik emes taýarlarǵa – 15,8% (2023 jylǵy mamyrda – 17,2%), aqyly qyzmetterge 13,3% (2023 jylǵy mamyrda – 13,5%) ósti.

Ótken jylǵy maýsymmen salystyrǵanda baǵanyń ósýi kúrishke – 47,6%, qııarǵa – 33,4%, shaqpaq qantqa – 32,2%, mıneraldy sýǵa – 29,1%, suly jarmasyna – 24,3%, makaron ónimderine – 24,1%, toqash jáne unnan daıyndalatyn ónimderge – 24%, jumyrtqaǵa – 23,1%, qaımaqqa – 23%, maılylyǵy 2,5% aıranǵa – 22,6%, untaq jarmaǵa – 22,5%, pasterlengen sútke – 21,6%, pııazǵa – 18,7%, sary maıǵa – 16,6%, qara bıdaı-bıdaı nanyna 15,6% belgilendi. Baǵanyń tómendeýi qyryqqabatqa 13,8%, qumshekerge – 11,5%, sábizge – 9,5%, kartopqa – 9,1% baıqaldy.

Baǵa deńgeıi keńse taýarlaryna – 67,7%, jýǵysh jáne tazalaǵysh quraldarǵa – 36,2%, jeke qoldanylatyn taýarlarǵa – 24,6%, jıhaz jáne úıge qajetti zattarǵa – 20,3%, ydysqa – 18%, kıim jáne aıaq kıimge – 15,7%, qurylys materıaldaryna 13,5% ósti. Dızel otyny 36,1% qymbattady.

Turǵyn úıdi jalǵa alý quny 25,4% ósti. Baǵa keshendi demalystardy uıymdastyrý qyzmetterine – 24,3%, sanatorııler qyzmetterine – 20%, demalys jáne sporttyq is-sharalar salasyndaǵy qyzmetterge – 16,9%, qoǵamdyq tamaqtandyrý qyzmetterine – 16,6%, shashtarazdar men jeke qyzmet kórsetý oryndary qyzmetterine – 15,1%, densaýlyq saqtaý qyzmetterine – 14,8%, bilim berý qyzmetterine – 14%, qonaq úıler qyzmetterine 12,6% joǵarylady. Jolaýshylar temir jol kóligi qyzmetteri – 26,5%, áýe kóligi qyzmetteri 22% qymbattady.

Tarıfter qoqys shyǵarýǵa – 31%, turǵyn úıdi kútip ustaýǵa – 21,4%, ortalyqtan jylytýǵa – 10,1%, elektr energııasyna – 8,6%, ystyq sýǵa 5,3% ósti.

Óńirler bólinisinde 2023 jylǵy maýsymda jyldyq mánde ortasha respýblıkalyq deńgeıden asatyn ınflıatsııanyń eń joǵary deńgeıi Soltústik Qazaqstan, Ulytaý (15,9%-dan), Aqmola oblysy, Astana qalasynda (15,8%-dan), Mańǵystaý oblysynda (15,6%), Shyǵys Qazaqstan (15,3%), Pavlodar (15%), Abaı, Jetisý, Qostanaı oblystarynda (14,7%-dan) qalyptasty.