Infektsıonıst jazda jıi bolatyn ishek aýrýlarynyń aldyn alý jolyn aıtty

ALMATY. QazAqparat – Infektsıonıst-dáriger Tamara Otaǵanova óńirlik kommýnıkatsııalar qyzmetinde ótken brıfıng barysynda qaýipti ınfektsııanyń sebepteri men aldyn alý joldaryn túsindirdi, dep habarlaıdy QazAqparat tilshisi.

Dárigerdiń aıtýynsha, ishek ınfektsııalary jyldyń barlyq mezgilinde bolady. Desek te, adamdar jazda kóbirek aýyrady. Bul osy mezgilde kúnniń ystyq bolýyna baılanysty.

Іshek ınfektsııalarynyń eń qaýiptisi salmonellez, dızenterııa jáne taǵamdyq toksıkoınfektsııa. Eger ishek ınfektsııasyn ýaqytynda emdemese, onda bul adamǵa degıdratatsııamen qaýip tóndiredi.

Іshek ınfektsııasynyń alǵashqy belgileri ártúrli: bas aınalý, júrek aıný, qusý, ishtiń mezgil-mezgil aýyrýy, dıareıa, qaltyraý.

«Іshek ınfektsııasy aǵzaǵa qoldyń kiri, ashyq sý jáne durys saqtalmaǵan taǵamdar, jýylmaǵan kókónister men jemister arqyly juǵady. Sondyqtan qolyńyzdy sabynmen jıi jýyp, qaınaǵan sý iship, tek jańa daıyndalǵan taǵamdarmen tamaqtaný kerek», - deıdi maman.

Spıkerdiń sózinshe, ishek ınfektsııasy – birinshi kezekte as qorytý jolyn zaqymdaıtyn juqpaly aýrýlardyń toby.

«Onyń paıda bolýyna negizinen mıkroaǵzalardyń bakterııa, vırýs syndy túrleri sebep. Infektsııa kózi – naýqas adam nemese jiti ishek ınfektsııa qozdyrǵyshtarynyń tasymaldaýshysy. Aınaladaǵy adamdar úshin, ásirese, aýrýdyń jeńil, anyq baıqalmaıtyn jáne sımptomsyz túrlerine shaldyqqandar óte qaýipti»,- dedi Tamara Otaǵanova.