Indýstrııalyq baǵdarlama aıasynda bes jylda 17 myń joǵary bilimdi maman qajet - QR BǴM
«Búgingi tańda Qazaqstanda jastardyń sany halyqtyń 25 paıyzynan astam úlesin qamtyp otyr. Osy jastardyń ishinde (14-29 jas aralyǵynda) 40 paıyzdan astamy 1,7 mln. adam qazirgi kezde bilim berý salasynda tálim alýda, ıaǵnı orta mektepterde, kásibı-tehnıkalyq oqý oryndarynda, JOO-larda oqyp jatyr. Sondyqtan da «Nurly jol» jańa ekonomıkalyq saıasat baǵdarlamasy - bizdiń jastardyń qatysýyna úlken mańyzy bar faktor. Ol búgingi tańda jastardyń sapaly bilimi men kásibı daıyndyǵyn talap etedi», - dedi vıtse-mınıstr.
Osy oraıda ol Elbasy ındýstrııalandyrý baǵdarlamasynyń aıasynda joǵary oqý oryndarynyń zerthanalyq bazalaryn júıege keltirý úshin jáne JOO-lardy damytý turǵysynda aldaǵy úsh jylda 10 mlrd. teńge kóleminde qarjy bólýdi tapsyrǵanyn eske salyp ótti.
«Osy maqsatta bizdiń mınıstrlik 10 joǵary oqý ornyn jáne kolledjderdi qazir anyqtap, ındýstrııalyq-ınnovatsııalyq damý baǵdarlamasyna qajetti bilikti mamandardy daıarlaıdy. Bizdiń zertteýimiz boıynsha, bul jańa baǵdarlamada aladaǵy bes jylda 35 myńnan astam maman qajet bolady. Olardyń ishinde 17 myńy joǵary bilimdi, 18 myńy tehnıkalyq-kásiptik bilimi bar mamandar», - dedi T. Balyqbaev.
Onyń sózine qaraǵanda, bul mamandardy daıarlaý úshin joǵary oqý oryndarynda arnaıy mamandyqtar ashylady. Osy baǵyttaǵy tıisti jumystardy atqarý úshin bıyl JOO-larǵa 4 mlrd. teńgege tarta qarjy bólinip, ıgeriledi.
Budan buryn habarlanǵandaı, Qazaqstanda ÚIID MB mamandaryn 10 JOO daıyndaıtyn bolady. Aldaǵy 5 jyl kóleminde elimizdegi joǵary oqý oryndary Údemeli ındýstrııalyq-ınnovatsııalyq damý baǵdarlamasyna ózindik úlesin qospaqshy. T. Balyqbaevtyń aıtýynsha, osy maqsatta qajetti qarjy bólinip, jańa bilim berý baǵdarlamalary jasalyp, sondaı-aq materıaldyq baza kúsheıtilip, professorlyq-oqytýshylyq quram keńeıtiletin bolady.
