Indonezııada Levotobı Lakı-Lakı janartaýy qaıta atqylaı bastady
ASTANA. KAZINFORM — Indonezııanyń Shyǵys Nýsa-Tengara provıntsııasynda ornalasqan Levotobı Lakı-Lakı janartaýy taǵy da belsendilik tanytty, dep habarlaıdy Anadoly.
Indonezııanyń Geologııa agenttiginiń derekterine sáıkes, janartaýdan shyqqan kúl baǵany 18 shaqyrym bıiktikke deıin jetip, mańaıdaǵy aýyldardy kúlmen jaýyp tastaǵan. Atqylaý aldyńǵy kúni bastalyp, alǵashynda kúl baǵany shamamen 10 shaqyrymǵa kóterilgen.
Aldyn ala málimet boıynsha, qaza tapqandar men zardap shekkender tirkelgen joq. Degenmen, jergilikti bılik týrısterge qaýipsizdik maqsatynda janartaý mańyndaǵy qaýipti aımaqqa barmaýǵa keńes aıtty. 18 maýsymdaǵy sońǵy atqylaýdan keıin qaýip deńgeıi eń joǵarǵy deńgeıge kóterilip, shekteý aýmaǵy 7 shaqyrymǵa deıin keńeıtilgen bolatyn.
1584 metr bıiktiktegi Levotobı Lakı-Lakı janartaýy Levotobı Perempýan janartaýmen birge «egiz janartaýlar» dep atalady. Olar bir óńirde qatar ornalasqan.
Indonezııa Tynyq muhıtynyń «otty beldeýi» atalatyn seısmıkalyq belsendi aımaqta ornalasqan, bul el aýmaǵynda shamamen 130 belsendi janartaý bar. Osyǵan baılanysty Indonezııa janartaý sany boıynsha álemdegi eń belsendi elderdiń biri sanalady.
Eske sala keteıik, 2024 jyldyń qarashasynda Levotobı Lakı-Lakı janartaýynyń atqylaýy saldarynan toǵyz adam qaza taýyp, kóptegen turǵyn zardap shekken edi.
Aıta ketelik Kamchatkadaǵy jer silkinisinen keıin janartaýlar atqylaı bastady.