Indonezııada alǵash ret Ortalyq Azııany zertteý ortalyǵy ashyldy
DJAKARTA. KAZINFORM — Indonezııanyń ulttyq damý ýnıversıtetiniń bazasynda alǵashqy Ortalyq Azııany zertteý ortalyǵynyń ashylýy ótti. Onyń qyzmeti elimizdiń jáne ózge de Ortalyq Azııa memleketteriniń áleýetin, bul elderdegi qoǵamdyq-saıası jáne áleýmettik-ekonomıkalyq úderisterdi zerdeleýge, sondaı-aq ózara ınvestıtsııalyq, saýda-ekonomıkalyq jáne mádenı-gýmanıtarlyq baılanysty damytýǵa baǵyttalady.
Іs-sharaǵa Indonezııanyń SІM jáne dıplomatııalyq mıssııalar, saraptamalyq jáne jýrnalıstik toptar ókilderi, sondaı-aq ýnıversıtettiń oqytýshylary men stýdentteri qatysty.
Qazaqstannyń Indonezııadaǵy Elshisi Serjan Ábdikárimov óz sózinde 2022 jylǵy jalpyulttyq referendým arqyly jańartylǵan QR Konstıtýtsııasy negizinde elimizdi jan-jaqty jańǵyrtý, óńirlik ıntegratsııany damytý protsesi jáne Ortalyq Azııa memleketteri basshylarynyń VI konsýltatıvtik kezdesýiniń qorytyndysy men Indonezııadan 80-ge jýyq sportshy qatysatyn Astanada ótetin Dúnıejúzilik kóshpendiler oıyny týraly egjeı-tegjeıli aıtyp berdi.
Indonezııanyń geografııalyq qashyqtyǵy jáne Qazaqstan týraly tolyq jáne ózekti aqparattyń tapshylyǵy jaǵdaıynda Ortalyq Azııa zertteýler ortalyǵynyń qyzmeti habardarlyqty arttyrýǵa, saraptamalyq qaýymdastyqtar arasynda dıalog uıymdastyrýǵa, tájirıbe almasýǵa jáne Indonezııa men ASEAN elderimen túrli salalarda kópjaqty yntymaqtastyqty nyǵaıtý boıynsha usynystar ázirleýge oń yqpalyn beretini atalyp ótti.
Jıynǵa qatysqan Indonezııanyń resmı tulǵalary men sarapshylary QR Prezıdenti Qasym-Jomart Toqaevtyń «Ortalyq Azııanyń Renessansy: ornyqty damý men órkendeý jolynda» atty maqalasymen tanysyp, Qazaqstan men óńirimizdiń qazirgi álemdegi ósip kele jatqan geosaıası jáne geoekonomıkalyq rólin eskere otyryp, osyndaı taldamalyq ınstıtýt qurýdyń ýaqtyly ekenin jáne paıdasyn atap ótip, óńirimizdi zertteýge ǵylymı jáne qoldanbaly qyzyǵýshylyqty belgilep, kezdesý taqyrybyna naqty usynystar engizdi.
Bir kún burynǵy Halyqaralyq ıadrolyq synaqtarǵa qarsy kúndi eskere otyryp, qatysýshylardyń nazaryna Qazaqstannyń osy úderistegi róli men kúsh-jigeri týraly aqparat jetkizildi jáne Semeı ıadrolyq synaq polıgonynyń qyzmeti men jabylýy týraly derekti fılm kórsetildi.
Shara barysynda ýnıversıtettiń ortalyq zalynda elimizdiń kórkem tabıǵı landshaft men kórnekti oryndary beınelengen fotokórme ashyldy. Sondaı-aq Qazaqstannyń baı týrıstik áleýeti týraly beınerolıkter kórsetilip, býkletter taratyldy.
