Inderborda eki bala mert bolǵan órt: páterden janarmaı ıisi bar quty tabylǵan

ATYRAÝ. KAZINFORM – Atyraý oblysynyń Inderbor kentindegi páter órtine qatysy bar kúdikti Oral qalasyna qashpaq bolǵan. Órtengen páterden janarmaı ıisi bar quty qaldyǵy tabylǵan. 

Atyraý oblystyq polıtsııa departamenti bastyǵynyń orynbasary Bolat Kóshqalıevtyń aıtýynsha, ustalǵan kúdiktige qatysty sotqa deıingi tergeý júrgizilip jatyr.

«Inder aýdandyq polıtsııa bóliminiń jedel tergeý tobynyń izdestirýi kezinde órtengen páterden janar maı ıisi bar quty qaldyqtary tabyldy. Oral qalasyna baǵyt alǵan jastaǵy 31 kúdikti Oral qalasyna baǵyt kezde ustaldy. Onyń jaqyn jerdegi janarmaı beketinen benzın satyp alǵany beınekameradaǵy jazba arqyly anyqtaldy. Kúdikti jábirlenýshiniń tanysy ekeni belgili boldy», - dep habarlady Bolat Kóshqalıev.

Onyń málimetinshe, qazir QR Qylmystyq kodeksiniń 99-babynyń 2-bóliginiń birneshe tarmaǵymen qylmystyq is qozǵalǵan. Kúdikti ýaqytsha ustaý ızolıatorynda qamaýda otyr.

«Qazir kúdiktiniń basqa adamdy quqyqqa qarsy qasaqana qazaǵa ushyratý, eki nemese odan da kóp adamdy óltirý, asa qatygezdikpen, basqa adamdardyń ómirine qaýipti tásilmen, tótenshe jaǵdaı kezinde jasalǵan jáne jasóspirimderdi óltirý deregimen qylmystyq tergelýde. Atalǵan bap boıynsha belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyra otyryp, bas bostandyǵynan ómir boıyna aıyrýǵa jazasy kózdelgen», - dep málim etti Bolat Kóshqalıev.

Eske sala ketelik, buǵan deıin Atyraý oblysyndaǵy Inderbor kentinde órtten eki bala mert bolǵan edi.

Keıin órtte kúıip qalǵan eki adamnyń jaǵdaıy aýyr ekenin habarladyq.

Sondaı-aq, eki balanyń ómirin qıǵan órtke kúdikti qamaýǵa alynǵanyn jazǵan bolatynbyz.