Atyraý oblysynda aýyl áıelderiniń aımaqtyq forýmy ótti
ATYRAÝ. KAZINFORM — QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa jáne «Aýyl» partııasy bastamasymen Inder aýdanynda «Aýyl áıeli: Birlik. Damý. Bolashaq» taqyrybynda aýyl áıelderiniń aımaqtyq forýmy ótti.
Atalmysh forýmǵa Aqtóbe, Mańǵystaý, Batys Qazaqstan, Atyraý oblystarynan 100-ge jýyq analar men qyz-kelinshekter qatynasty. Aýyldyq jerlerdegi áıelderdiń rolin talqylaý, olardyń kóshbasshylyq áleýetin nyǵaıtý. Áıel kásipkerlerdi qoldaý jáne ilgeriletý, eksport pen kooperatsııa múmkindikterin keńeıtý, urpaqtar sabaqtastyǵy men dástúrli qundylyqtaryn nyǵaıtý maqsatynda uıymdastyrylǵan forým arnaıy sherýmen ashyldy. Sherýdi atalar men ájeler mektebi bastap shyqty. Aýdanda ornalasqan óndiristik mekemeler men sharýa qojalyqtarynyń óndirgen ónimderden kórme uıymdastyryldy.
Atyraý oblysy ákiminiń orynbasary Marat Mýrzıev forýmnyń ashylýymen oblys ákimdiginiń atynan quttyqtap ótti.
— Bul forým Forým jumysyna qatysýshy Ulttyq komıssııa múshelerine, Aýyl partııasyna, Astana qalasy men Aqtóbe, Batys Qazaqstan, Mańǵystaý oblystarynan arnaıy kelgen qadirli meımandarǵa Atyraý oblysy ákim atynan zor rızashylyq bildiremiz. Aýyl áıeliniń beınesi — ana, jar, ustaz, kásipker ári eńbekker retinde elimizdiń bolashaǵy úshin mańyzǵa ıe. Sondyqtan, búgingi forým — aýyl áıeliniń mártebesin arttyrýmen qatar, olardyń ıdeıalary men usynystaryn eskeretin, naqty is-sharalarǵa negiz bolatyn alań bolaryna senemiz. Aýyl — bizdiń rýhanı túp-tamyrymyz, dástúr men tárbıeniń bastaýy. Al áıel — sol aýyldyń jylýyn, berekesin, tirligin saqtap otyrǵan tirek. Búgingi forým aıasynda aıtylǵan árbir usynys, bastama — tek aýyl áıeliniń ǵana emes, tutas aýyldyń, elimizdiń bolashaǵyna salynǵan jol bolaryna senemin, — dedi aımaq basshysynyń orynbasary Marat Bısenǵalıuly óz sózinde.
Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi, «Aýyl partııasy ortalyq apparaty basshysynyń orynbasary Aıgerim Sarsenbaeva memleket tarapynan áıelder qaýymynyń múddesi úshin ulanǵaıyr ister atqarylyp jatyrǵanyn tilge tıek etti.
— Halyqaralyq aýyl áıelderi kúnimen tuspa-tus kelip otyrǵan búgingi forým — áıelderdiń aýyldaǵy áleýetin, áleýmettik-ekonomıkalyq belsendiligin arttyrýǵa, kóshbasshylyq qabiletterin damytýǵa baǵyttalǵan naqty qadam. Bul — aýyl áıeliniń úni estiletin, eńbegi elenetin, usynysy nazarǵa alynatyn mańyzdy alań. Qazirgi tańda aýyl áıelderi — tek otbasynyń uıytqysy ǵana emes, sonymen qatar muǵalim, dáriger, kásipker, máslıhat depýtaty, qoǵam belsendisi. Atyraý da óz kásibin dóńgeletip otyrǵan, aýyldastaryn jumyspen qamtyp otyrǵan, ónegeli isterimen elge úlgi bolyp júrgen áıelder az emes. Bul — biz úshin úlken maqtanysh! Búgingi forýmnyń da basty maqsaty — sol eńbekti baǵalaý, tyń ıdeıalardy ortaǵa salyp, aýyl áıelderiniń áleýmettik, ekonomıkalyq jáne saıası belsendiligin arttyrýǵa jol ashý, — dedi quttyqtaý sózinde.
Respýblıkalyq «Aýyl» partııasy tóraǵasynyń orynbasary Qýanysh Seıtjanov partııanyń bastamasymen kópitegen ıgilikti ister atqarylyp jatyrǵanyn baıandap ótti.
Forýmynyń plenarlyq otyrysynda Atyraý oblystyq kásipkerlikti damytý basqarmasynyń kásipkerlikti qoldaý bóliminiń basshysy Perızat Tańatova, oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Álfıa Tóleǵarıeva, Aqtóbe oblystyq máslıhatynyń depýtaty, «Nuraly» sharýa qojalyǵynyń jetekshisi Kamshat Týleýova, aýylsharýashylyq ǵylymynyń kandıdaty, proefssor, Qostanaı oblystyq máslıhatynyń depýtaty Gaınııa Eseeeva, Batys Qazaqstan oblysy «Aqjaıyq aýdandyq isker áıelder» keńesiniń tóraǵasy Lazzat Seıitkereeva, «Amanat» partııasy Inder aýdandyq fılıalynyń atqarýshy hatshysy Aqjibek Sabyrǵalıeva, Qurmanǵazy aýdany otbasyn qoldaý ortalyǵynyń bólim basshysy Zámzagúl Karsakova túrli taqyryptar boıynsha habarlama jasady.
Statıstıka boıynsha, elimizde aýyldyq jerlerdegi shaǵyn jáne orta bızneste jumys jasaıtyn áıelderdiń úlesi artyp keledi. Olar óz kásipterin ashyp, jańa jumys oryndaryn quryp, ekonomıkalyq ósimge de úles qosty.
Aımaqtyq forýmnyń ekinshi bóliminde óz salalary boıynsha belsendi qyzmet atqaryp júrgen bir top qyz kelinshekter «Jyl úzdigi» atanyp arnaıy marapattaldy.