Importtyq ónimder men qyzmet túrleriniń tizbesi jasalady
Óndiristegi jergilikti úlesti arttyrý úshin ımporttyq ónimder men qyzmet túrleriniń tizbesi jasalmaq. Óńir ákimdigi bul qadamǵa óńirlik taýar óndirýshilerdi qoldaý maqsatynda baryp otyr.
Oblystyq kásipkerlik jáne ındýstrııalyq-ınnovatsııalyq damý basqarmasynyń basshysy Maqsat Músápirbekov bul máselemen arnaıy qurylǵan komıssııa aınalysyp jatqanyn aıtty. Komıssııa óńirdegi iri kásiporyndardyń óndiriste tutynatyn materıaldary men qyzmet túrlerine taldaý jasaǵan. Mysaly, Óskemendegi júıequraýshy sanalatyn alty alpaýyt kásiporyn qajet materıaldyń basym bóligin áli de bolsa syrttan alǵyzady. Jergilikti quramnyń úlesi 30 paıyzdyń aınalasynda. Al syrttan alynatyn taýardyń birshama bóligi ózimizde de óndiriledi. Osy máselemen komıssııa músheleri «Qaztsınk», «ÚMZ», «TMK», «Armatýra zaýyty», «Azııa-Avto» syndy kompanııalarǵa shyqqan eken.
«Atalǵan alty kásiporyn jylyna 206,9 mlrd. teńgeniń taýary men qyzmetin tutynýda. Bir jubanarlyq jaıt, osy kásiporyndarǵa kórsetiletin qyzmettiń 90 paıyzdan astamy jergilikti mekemelerge tıesili», - deıdi M.Músápirbekov.
Jergilikti taýar óndirýshilerdiń túıitkilderin sheship júrgen birden-bir uıym - «Atameken» kásipkerler palatasy. Maqsat Músápirbekov osy mekemeniń arqasynda quqyǵy taptalyp, óndiristegi úlesten qaǵylǵan birneshe óndirýshiniń máselesi der kezinde sheshilgenin atady.
Oblys ákiminiń birinshi orynbasary Nurymbet Saqtaǵanov jergilikti taýar óndirýshiler óziniń eksporttyq áleýetin de tolyqtaı paıdalana almaı otyrǵanyn aıtady. Bul áleýet ıgerilse, suranystyń azdyǵynan tolyq qýatyna ene almaı turǵan «Melıssa», «Kemont» sııaqty ozyq tehnologııaǵa ıe kásiporyndar óndiris aıasyn keńeıter edi.
«Eki jaǵymyzda eki alyp naryq jatyr. Ásirese, ekonomıkalyq odaq aıasynda Reseı men Belarýs elderine taýar jetkizýdiń múmkindikteri mol. «Atameken» palatasy osy baǵytta da qarqyndy jumys isteýi kerek», - deıdi Nurymbet Saqtaǵanov.
Al oblystyq máslıhat hatshysy Vladımır Golovatıýk ózimizde óndiriletin ónimdi syrttan alǵyzý ádeti kásiporyndardyń arasynda tyǵyz baılanystyń joqtyǵynan joıylmaı tur degen pikirde.
«Óskemendegi «Kemont» kompanııasy usynyp otyrǵan elektr qondyrǵylary sapasy jaǵynan sheteldik balamalarynan esh kem emes. Sóıte tura, bizdegi alpaýyt kásiporyndar ejelgi seriktesterine júginýin jalǵastyryp keledi. Jergilikti ónimniń sapasymen qosa baǵasy da, tasymaldaý jáne qyzmet kórsetý quny da arzan. Kásipkerler palatasy da, oblystyq basqarma da kásiporyndardyń arasyndaǵy baılanystyń nyǵaıýyna udaıy kúsh salyp otyrýy kerek», - deıdi ol V.Golovatıýk.
Osy maqsatta óńirdegi iri kásiporyndar tutynatyn taýarlary men qyzmet túrleriniń kestesi túzilmek. Bul keste jan-jaqty taldaýdan ótip, naqtylanǵannan keıin óńirdegi taýar óndirýshi kompanııalarǵa taratylýy tıis. Tıisinshe, shaǵyn jáne orta bıznes nysandary óz óndirisin sol tizimge yńǵaılap quratyn bolady.
