Importtyq taýarlarǵa mınımaldy baǵalar deńgeıi engiziledi
ASTANA. KAZINFORM — Mınımaldy baǵalar deńgeıin qoldaný týraly sheshim qabyldandy. Bul týraly Saýda jáne ıntegratsııa mınıstrliginiń baspasóz qyzmeti habarlady.
— Osy jyldyń 16 maýsymynda Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııa mynadaı taýarlarǵa qatysty mınımaldy baǵalar deńgeıin (MBD) qoldaný týraly sheshim qabyldady: irimshik pen súzbe, kartop, qyryqqabat, sábiz, sańyraýqulaqtar, banan, apelsın, mandarın, alma, hýrma, kókjıdek, kúnbaǵys dánderi, margarın, shujyq ónimderi, makaron ónimderi, mıneraldy nemese hımııalyq tyńaıtqyshtar, eritkishter men suıyltqyshtar, antıfrızder, shlak maqtasy, mıneraldy sılıkat maqtasy, otqa tózimdi kirpishter, — delingen mınıstrlik habarlamasynda.
Mınımaldy baǵalar deńgeıi (MBD) taýarlardyń kóterme jáne bólshek baǵasyna áser etpeıdi. MBD tek ımport kezinde salyqtardy esepteý úshin qoldanylady. MBD — bul ımport kezinde QQS tóleýden jaltarýǵa jol bermeýge arnalǵan tetik.
Osyǵan baılanysty Saýda jáne ıntegratsııa mınıstrligi respýblıkada óndirilmeıtin taýarlarǵa MBD esepteýdiń jańa formýlasyn aıqyndaıtyn buıryq jobasyn ázirledi.
Jekelegen taýar túrlerine qatysty mınımaldy baǵalar deńgeıin qoldaný tizbesi (QR Úkimetiniń 14.12.2021 j. № 882 qaýlysy) 2 bólimge bólingen (bekitilý satysynda):
Qazaqstan Respýblıkasynyń aýmaǵynda óndiriletin taýarlar;
Qazaqstan Respýblıkasynyń aýmaǵynda óndirilmeıtin taýarlar.
MBD ımporttaýshy málimdegen baǵa men otandyq óndirýshiler baǵasynyń ortasha máni retinde esepteledi. Bul kórsetkish tek ımport kezinde QQS somasyn esepteý úshin qoldanylady.
MBD tetigi salyq organdarynyń bastamasymen 2021 jyly qabyldanǵan jáne 2022 jylǵy 1 shildeden bastap qoldanylady.
— MBD tetigine salyq organdary taýarlardyń tym tómen baǵamen ákeliný jaǵdaılaryn tirkegen kezde júginedi. Mysaly, 2025 jyly naryqtyq quny 500 teńge bolǵanda alma 9 teńgeden, naryqtyq quny 1200 teńge bolǵanda banan 23 teńgeden, naryqtyq quny 900 teńge bolǵanda apelsın 22 teńgeden, al naryqtyq baǵasy shamamen 3,5 myń teńge bolǵanda shujyq 695 teńgeden ákelingen. Mundaı baǵalar ımport kezinde tólenýi tıis QQS somasynyń aıtarlyqtaı azaıýyna ákeledi, — delingen habarlamada
Aıta ketelik Astanada azyq-túlik taýarlarynyń assortımenti keńeıtildi.