Ilon Masktiń Marsqa ushatyn zymyrany synaq kezinde jarylyp ketti

TEHAS. QazAqparat – Sársenbi kúni Tehas shtatynyń Boka-Chıka aımaǵynda iske qosý kesheninde SpaceX kompanııasyna tıesili Starship Mk1 ǵarysh kemesiniń birinshi portotıpi synaqtan ótý barysynda jaryldy, dep habarlaıdy QazAqparat CBSNews-ge silteme jasap.

Metan men ottegige arnalǵan tsısternalar krıogendik suıyqpen toltyrylǵan kezde kemeniń joǵarǵy bóligi jarylyp ketken.

SpaceX kompanııasy málimdemesinde synaqtyń maqsaty keme júıelerindegi qysymdy barynsha arttyrý ekenin jáne onyń nátıjesi oıdaǵydaı bolmaǵanyn atap ótti.

«Qyzmetkerlerdiń eshqaısysy zardap shekken joq, al bul oqıǵa jumysty odan ári toqtatpaıdy», - delingen málimdemede.

Sondaı-aq kompanııa kemeniń búlingen prototıpin jóndemeı, birden Mk3 tájirıbeli nusqasyn qurýǵa kirisetinin jetkizdi.

SpaceX kompanııasynyń negizin qalaýshy Ilon Mask Tehas shtatynda 28 qyrkúıekte Starship kemesi prototıpiniń tusaýkeserin ótkizip, alǵashqy orbıtalyq ushý aldaǵy aılarǵa josparlanǵanyn málimdegen bolatyn. Ǵarysh kemesin jasaýshylardyń oıynsha, Starship jolaýshylar men júkterdi Jer orbıtasyna, Aıǵa jáne eń sońynda Marsqa jetkizedi.