Ilon Mask dáýleti 800 mlrd dollardan asqan alǵashqy adam boldy

ASTANA. KAZINFORM – Bul Ilon Masktyń eki kompanııasy – SpaceX jáne xAI-diń birigýinen keıin múmkin boldy. Bul onyń baılyǵyn aıtarlyqtaı arttyrdy.

Forbes baǵalaýynsha, kelisim SpaceX-xAI biriktirilgen kompanııasynyń jalpy qunyn 1,25 trln dollarǵa baǵalap otyr. Sonyń arqasynda Ilon Masktyń baılyǵy 84 mlrd dollarǵa artyp, 852 mlrd dollarǵa jetti. Qazir ol kompanııanyń jalpy aktsııalarynyń shamamen 43%-yna ıelik etedi. Kelisimge deıin Mask SpaceX aktsııalarynyń 42% jáne xAI-diń 49%-na ıelik etken. xAI SpaceX-ti satyp alǵannan keıin aeroǵarysh korporatsııasy ilgerilep, Masktyń eń qundy aktıvine aınaldy.

SpaceX ústemdigine qaramastan, Tesla Masktyń negizgi baılyq kóziniń biri bolyp qalyp otyr. The Economic Times jazýynsha, ol elektromobıl óndirýshisiniń shamamen 178 mlrd dollarǵa baǵalanǵan aktsııalarynyń shamamen 12%-yna, sondaı-aq taǵy 124 mlrd dollarǵa baǵalanǵan aktsııa optsıondaryna ıelik etip otyr.

Bul sandarǵa Tesla aktsıonerleriniń qarasha aıynda maquldaǵan Masktyń daýly rekordtyq ótemaqy paketi kirmeıdi. Eger elektromobıl óndirýshisi kelesi onjyldyqta naryqtyq kapıtaldandyrýdy segiz esege arttyrýdy qosa alǵanda «Marsqa ushý» tárizdi ambıtsııaly maqsattaryna qol jetkizse bul paket saıyp kelgende Maskke qosymsha aktsııa túrinde 1 trln dollarǵa deıin paıda ákelýi múmkin.

SpaceX-xAI kelisimi Masktyń kompanııalarynyń bir jyldan az ýaqyt ishinde ekinshi iri birigýi boldy. Ótken jyldyń naýryz aıynda ol xAI-di óziniń X (burynǵy Twitter) áleýmettik medıa-platformasymen biriktirip, xAI-di 80 mlrd dollarǵa, al X-ti 33 mlrd dollarǵa baǵalady.

Buǵan deıin Parıjde Ilon Masktiń X kompanııasynyń keńsesinde tintý júrgizilgenin jazdyq.