Illınoıs ýnıversıtetiniń burynǵy qyzmetkeri Trampqa qaýip tóndirgeni úshin ustaldy
ASTANA. KAZINFORM — AQSh Federaldyq tergeý bıýrosy (FTB) Illınoıs shtatyndaǵy ýnıversıtettiń burynǵy qyzmetkeri, 27 jastaǵy Derek Lopesti Donald Trampqa qoqan-loqqy kórsetkeni úshin qamap qoıdy, dep jazdy TASS.
Bul týraly Fox News telearnasy FTB málimdemesine silteme jasap habarlaǵan.
«Kúdiktini ustaýǵa deıin bir aı boıy FTB men Qupııa qyzmet, sondaı-aq Illınoıs ýnıversıtetiniń polıtsııasy birlesken tergeý amaldaryn júrgizdi. Lopes qazirgi prezıdentke qaýip tóndirgen bolýy múmkin degen boljam bar. Osy faktige baılanysty oǵan federaldyq aıyp taǵyldy», dep jazylǵan málimdemede.
Qoqan-loqqynyń naqty mazmuny ázirge jarııalanǵan joq. Fox News-ke pikir bildirgen FTB basshysy Kesh Patel Lopestiń áreketin «jıirkenishti» dep atap, mundaı isterge «amerıkalyq qoǵamda oryn joq» ekenin aıtty.
Aıta keteıik, Donald Trampqa ótken jyly eki ret qastandyq jasalǵan. Birinshi oqıǵa shilde aıynda Batler qalasynda ótken saılaýaldy mıtıng kezinde bolǵan. Onda mergen atqan oq saıasatkerdiń qulaǵyn janap ótken.
Kóp uzamaı prezıdent Donald Trampty óltirmek bolǵan adamnyń 20 jastaǵy Tomas Mettıý Krýks ekeni anyqtaldy.
Al byltyrǵy qyrkúıekte AQSh prezıdentine taǵy shabýyl jasaldy.