Ilıa Terenchenko Pavlodar oblysy máslıhatyna tóraǵa boldy

PAVLODAR. QazAqparat - Oblystyq máslıhatta VIII shaqyrylym depýtattarynyń birinshi uıymdastyrý sessııasy ótti, dep habarlaıdy QazAqparat.

Jergilikti ókildi organǵa 32 adam ótti: partııalyq tizim boıynsha – 16 jáne saılaý nátıjelerine sáıkes birmandatty aýmaqtyq saılaý okrýgteri boıynsha – 16 adam.

Onyń 13-i – ótken shaqyrylymdaǵy oblystyq máslıhat depýtattary.

Qazirgi tańda depýtattyq korpýsta 26 er adam men alty áıel bar. Kóbi kommertsııalyq qurylymdarda jumys isteıdi.

Sondaı-aq ÚEU, ónerkásip, bilim berý jáne medıtsına salalarynyń ókilderi bar.

Jańa shaqyrylym depýtattarynyń ortasha jasy – 49. Eń jas depýtat 34-te.

Birinshi sessııada oblystyq máslıhat depýtattaryna tósbelgiler men kýálikter tabys etildi.

Kezdesýdiń basty máseleleriniń biri tóraǵany tańdaý boldy.

Laýazymǵa tek bir ǵana kandıdatýra – AMANAT partııasy oblystyq fılıalynyń tóraǵasy Ilıa Terenchenko usynyldy.

Depýtattar Ilıa Terenchenkonyń kandıdatýrasyn biraýyzdan maquldady.

Sondaı-aq, birinshi uıymdastyrý sessııasynda turaqty komıssııalar anyqtaldy. Olardyń sany – jeteý. Depýtattar ekonomıka jáne bıýdjettik josparlaý, bilim berý, densaýlyq saqtaý, mádenıet jáne áleýmettik qorǵaý, jastar, qurylys, ónerkásip jáne TKSh máselelerimen aınalysady. Agrarlyq sektor, ekologııa jáne qorshaǵan ortany qorǵaý, azamattardyń quqyqtary men zańdy múddelerin qamtamasyz etý máseleleri boıynsha jekelegen komıssııalar quryldy.

– Búgin sizder oblystyq máslıhattyń jańa tóraǵasyn saıladyńyzdar. Ilıa Sergeevıchtiń partııalyq jáne qoǵamdyq-saıası qyzmette mol tájirıbesi bar. Bizdiń birlesken jumysymyz sapaly ári tıimdi bolatynyna senemin, – dedi oblys ákimi Asaıyn Baıhanov. – Sizge úlken jaýapkershilik júkteledi. Sizdiń jumysyńyz turaqty tapsyrmalar jáne jeke qabyldaýlarmen shektelip qalmaýy kerek. Memleket basshysynyń mindetteri boıynsha – turaqty áleýmettik-ekonomıkalyq damý, turǵyndardyń ómir súrý jaǵdaılaryn jaqsartý, óńirge ınvestıtsııalar tartý boıynsha odan ári jumysty qamtamasyz etý qajet.

Oblys ákimi depýtattarǵa saılaý naýqany kezinde turǵyndarǵa bergen ýádelerin oryndaýy kerek ekenin eske saldy.

Oblystyq máslıhatta jeti turaqty komıssııa quryldy:

- ekonomıka jáne bıýdjet máseleleri jónindegi komıssııa (tóraǵa - Qalıjanova Sandýǵash);

- bilim, densaýlyq saqtaý, mádenıet jáne áleýmettik qorǵaý máseleleri jónindegi komıssııa (Aıtjanova Dınara);

- azamattardyń, shaǵyn jáne orta bıznes ókilderiniń quqyqtary men zańdy múddelerin qamtamasyz etý máseleleri jónindegi komıssııa (Amangeldi Mahanbet);

- agrarlyq máseleler jónindegi komıssııa (Amanjolov Bolat);

- ekologııa jáne qorshaǵan ortany qorǵaý máseleleri jónindegi komıssııa (Nurhanova Gúlmıra);

- jastar máseleleri jónindegi komıssııa (Kýrýmbaev Aıdar);

- qurylys, ónerkásip jáne turǵyn úı-kommýnaldyq sharýashylyq máseleleri jónindegi komıssııa (Solomkın Vıtalıı).

Aıta ketý kerek, oblysta alǵash ret jastar máseleleri jónindegi turaqty komıssııa quryldy.