IKAO Qazaqstannyń áýe qaýipsizdigine aýdıt júrgizedi

ASTANA. KAZINFORM — Bıyl qyrkúıekte halyqaralyq azamattyq avıatsııa uıymy (IKAO) elimizdiń áýe qaýipsizdigine aýdıt júrgizedi. Bul týraly Kólik mınıstrligi Azamattyq avıatsııa komıtetiniń tóraǵasy Saltanat Tompıeva málim etti.

— Avıatsııalyq qaýipsizdik sharalary turaqty túrde júrgiziledi. Bizde barlyq standartqa tolyq sáıkes keletin retteýshi organ bar. Avıatsııalyq qaýipsizdikke qatysty tekserýler jyl saıyn barlyq áýejaıda ótkiziledi. Zańnamany qaıta qaraý josparlanǵan bolatyn, (Almaty áýejaıyndaǵy oqıǵadan keıin — avtor.) qazir bul másele qaralyp jatyr, — dedi Saltanat Tompıeva Senatta ótken is-shara barysynda.

Sondaı-aq komıtet basshysy bıyl qyrkúıekte halyqaralyq azamattyq avıatsııa uıymy (IKAO) áýe qaýipsizdigi boıynsha aýdıt júrgizetinin tilge tıek etti. 

— Biz ózimizdiń joǵary nátıjemizdi rastap, avıatsııalyq qaýipsizdik deńgeıine sáıkestikti dáleldeýdi maqsat etip otyrmyz. Kólik mınıstrligi IKAO aýdıtiniń qorytyndylary boıynsha ózgerister engizedi, — deıdi ol.

Qazaqstan halyqaralyq azamattyq avıatsııa uıymyna (IKAO) byltyr jazda tirkeldi. 

Aıta ketsek, IKAO Qazaqstannyń Aqtaý mańyndaǵy ushaq apatyn tergeý boıynsha esebin joǵary baǵalady. 

Eske salaıyq, bıyl 7 naýryz kúni Almaty áýejaıynda er adam qyzdy kepilge alyp, kópshilik aldynda pyshaq kezengenin jazǵanbyz. 

Artynsha bolǵan oqıǵaǵa qatysty úsh qylmystyq is qozǵaldy. 

Sondaı-aq Memleket basshysynyń Jarlyǵymen qıyn-qystaý jaǵdaıda kórsetken erligi men janqııarlyǵy úshin Musa Saıranbaıuly Ábdiraıym «Erligi úshin» medalimen nagradtaldy.