Iisshil ıt qalaı tańdalyp, qyzmetke úıretiledi

NUR-SULTAN. QazAqparat - Áýejaıda adam qaýipsizdigin qamtamasyz etýde kınolog mamandar men úıretilgen ıtterdiń róli zor. Olar kúndelikti tekseristen tys, qaýipti, jarylǵysh zat nemese qaraýsyz qalǵan belgisiz zat týraly habar kelip túskende dereý iske kirisedi. Kınologtar qandaı jaǵdaıda jumys isteıdi jáne ıtterdi qalaı úıretetini týraly Nursultan Nazarbaev áýejaıynyń ınspektor-kınology Azamat Bazarbaev QazAqparat tilshisine aıtyp berdi.

Elorda áýejaıynyń kınologııa qyzmetiniń ınspektory Azamat Bazarbaev kásibı kınolog. Onyń qyzmet babymen elordaǵa aýysqanyna 3 aı ótipti. Atalǵan ýaqyttyń ishinde kınolog Temir esimdi úıretilgen ıtpen dostasyp, birge jumys istep keledi.

«Bul meniń áriptesim – Temir (Tımka), belgııalyq ovcharka tuqymyna jatady. Maǵan Temirmen jumysqa kirispes buryn onyń psıhologııalyq minezin anyqtadym. Ol sangvınıg. ıAǵnı únemi qımylda. Bizge ortaq tiltabysý qıynǵa soqpady, 1 aptalyq taǵylymdaman soń jumysqa kirisip kettim. Men mamandyǵym boıynsha qarjygermin. Biraq mamandyǵym boıynsha qyzmet etýge aıaǵym tartpady. Oılana kele kınologııa salasyn tańdadym. Bul qyzmettiń qyzyǵy men shyjyǵy kóp. Bizdiń jumysymyz tańǵy 7-de bastalady. Aldymen medıtsınalyq tekseristen ótemiz, sodan soń ıttiń jaǵdaıy qaralady. Bári durys bolsa jumysqa kirisemiz», - dedi Azamat Bazarbaev.

Elorda áýejaıyndaǵy ıisshil ıtterdiń negizgi mindeti qaýipti ári jarylǵysh zattardy anyqtap, tabý. Sonymen qatar qaraýsyz qalǵan belgisiz zattardy da taýyp jatady eken.

«Qyzmetke kez-kelgen ıt alynbaıdy. Iisshil ıt kúshik kúninen tańdalady. Basty talap kúshik oıynpaz jáne izpemdaz bolý kerek. Odan basqa qasıetterge úıretý kınologtyń mindeti. Bir ıtti tolyqtaı daıyndap shyǵýǵa 1 jyl ýaqyt ketedi. Jáne ıisshil ıtti bir ret úıretseń jetip jatyr deýge bolmaıdy. Kúndelikti jattyǵýdy talap etedi. Iisshil ıttiń kútimi men tamaqtandyrý bólek taqyryp. Sońǵy ýaqytta bizdiń elimizde kınologııa salasy jaqsy damyp keledi», - deıdi kınolog.

Onyń aıtýynsha, kúnine onnan astam túrli habarlama kelip túsedi. Onyń ishinde shuǵyl habarlamada shyǵyp turady.

«It jaqsy nemese jaman dep bólinbeıdi. Barlyǵy onyń ıesi men úıretýge baılanysty. Onyń ústine ıisshil ıtti kúshik kúninen buıryq pen nusqaýmen jumys isteýge úıretiledi. Negizi ıtti psıholog deýge bolady. Sebebi atalǵan úı janýary qarym-qatynasta árbir is áreketke asa mán beredi. Adammen de solaı. Bizde ár mamannyń ózine tıesili qyzmettik ıt bar. Biz úıretilgen ıtpen jumys istep qana qoımaımyz, tolyqtaı jaýaptymyn. ıAǵnı biz ıtti tamaqtandyramyz, serýendetemiz jáne jalpy jaǵdaıyn qadaǵalaımyz», - deıdi ol.

Sondaı-aq, kınolog jumys barysyndaǵy qyzyqty sátimen bólisti.

«Áýejaı avtoturaǵyn tekserý kezinde Temir aıaq astynan belgisiz ıisti sezip izdeı bastady. Avtoturaq úlken tıisinshe kólik te kóp. Aqyrynda kúdik týdyrǵan avtokólikti taýyp, meni baǵyttady. Basynda qaýipti múmkin zııandy zat eken dep oıladym. Bizdiń jumystaǵy mańyzdy erejeniń biri tabylǵan belgisiz zatty birden ustaýǵa bolmaıdy. Sebebi ol qaýipti bolýy múmkin. Temirdiń kólikten tapqan zatty da muqııat qarap, birden qolǵa alǵan joqpyz. Sóıtsek, prıanık bolyp shyqty», - deıdi maman.

Kınologtyń sózine sensek, úıretilgen ıt ortasha eseppen 6 jyl qyzmet etedi. Jáne búginde elorda áýejaıynda 4 kınolog maman jumys isteıdi.