ІІM Masanchı aýylynyń búgingi kórinisi týraly vıdeo taratty
Mınıstrliktiń Telegram paraqshasynda jarııalanǵan vıdeo materıalǵa sáıkes, órt saldarynan 25 jeke turǵyn úı, 31 kommertsııalyq nysan jáne 41 avtokólik zardap shekti. Turǵyndardyń qaýipsizdigin qamtamasyz etý men qaqtyǵystardy boldyrmaý úshin barlyq qajetti sharalar qabyldandy.
Polıtsıtseıler men Ulttyq ulannyń áskerı qyzmetshileri kóshelerdi sholǵyndaýdy jalǵastyrýda jáne quqyqtyq tártipti qadaǵalaýda. Oqıǵa ornynda tergeý jáne jedel toptar jumys isteýde.
Eske salaıyq, 7 aqpan kúni Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles boldy. QR Prezıdenti Qasym-Jomart Toqaev buzaqylyq sıpattaǵy jappaı tóbelesti arandatýshylar óz paıdasyna qoldanbaq bolǵanyn málimdedi.
Sondaı-aq vıtse-premer Berdibek Saparbaevtyń tóraǵalyǵymen úkimettik komıssııa qurylatynyn, qaza bolǵandardy jerleý, zardap shekkenderge kómektesý jumystary uıymdastyrylatynyn, qoǵamdyq tártipti buzǵandar anyqtalyp, qatań jaýapqa tartylatynyn málim etti. Bas prokýratýraǵa, Ulttyq qaýipsizdik komıtetine tıisti tapsyrma berildi.
Tártipsizdikter keıin Qordaı, Aýqatty, Sortobe eldi mekenderinde de bolǵan.
8 aqpan kúni Іshki ister mınıstri Erlan Turǵymbaev pen Aqparat jáne qoǵamdyq damý mınıstri Dáýren Abaev oqıǵaǵa qatysty elordadaǵy Ortalyq kommýnıkatsııalar qyzmetinde baspasóz máslıhatyn ótkizdi. Málim etilgendeı, janjalǵa basqa aýyldardan kelgen 300-den astam adam qosylǵan. Eki jaq bir-birine tas laqtyryp, taıaqpen uryp, qarý qoldanǵan. Oqıǵa ornynda 8 adam, aýrýhanada 2 adam kóz jumdy. 9 aqpan saǵat 11.00-degi málimet boıynsha, medıtsınalyq kómekke 165 adam júgingen.
