ІІM: kún saıyn jol apattarynan 10-ǵa jýyq adam qaza tabady

ASTANA. QazAqparat – Elimizde jol apaty oqıǵalarynyń azaıýy baıqalady. Degenmen jekelegen óńirlerde atalǵan problema áli de ózekti. Bul týraly Іshki ister mınıstrligi Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova búgin baspasóz máslıhatynda aıtty, dep habarlaıdy QazAqparat tilshisi.

«Bıyl 5 aıdyń qorytyndysy boıynsha elimizde jol apattary sanynyń tómendeýi baıqalady. Biraq, soǵan qaramastan jekelegen óńirlerdegi jaǵdaı alańdatarlyq kúıde qalyp otyr. Kún saıyn el joldarynda 10-ǵa deıin adam qaza taýyp, 70-ke jýyq adam túrli dene jaraqattaryn alady. Bul statıstıka kólik júrgizýshileri men jaıaý júrginshilerdiń jol erejeleri talaptaryna nemquraıly qaraıtyndyǵyn kórsetedi», - dedi ol.

Vedomstvo ókiliniń málimetinshe, jol boıyn belgilenbegen jerden kesip ótý, jolaqtan shyǵyp ketý, jyldamdyqty arttyrý, manevr jasaý erejelerin saqtamaýdyń arty qaıǵyǵa ákep jatady.

«Ókinishke qaraı, respýblıkalyq mańyzy bar joldar boıyndaǵy apat saldarynan bolatyn ólim-jitim toqtamaı tur. Jol apatynan bolatyn ólim-jitimniń 48% respýblıkalyq joldarǵa tıesili. Basqasha aıtqanda, 666 jol apatynyń 318-i qaıǵyly jaǵdaımen aıaqtalyp jatady», - deıdi ol.