ІІM qoǵamdyq qaýipsizdik tujyrymdamasyn ázirlep jatyr

ASTANA. QazAqparat – Іshki ister mınıstrligi qoǵam qaýipsizdigin áriptestik júıesi arqyly qamtamasyz etýdiń jańa tetikterin ázirleýge kiristi. Jańa tujyrymdama týraly atalǵan vedomstvonyń ókili Shuǵyla Turlybek aıtyp berdi, dep habarlaıdy QazAqparat tilshisi.

«Mınıstrlik qoǵamdyq qaýipsizdikti qoǵammen seriktestikte qamtamasyz etý tujyrymdamasynyń jobasyn ázirleýdi bastady. Bul - memlekettik organdardyń, kásibı polıtsııanyń jáne jaýapty qoǵamdastyqtyń ózara is-qımyly men belsendi qatysýyna negizdelgen quqyq buzýshylyqtardyń aldyn alýdyń keshendi júıesin qurýdyń irgetasy», - dedi Shuǵyla Turlybek vedomstvoda onlaın ótken baspasóz máslıhatynda.

Tujyrymdamanyń negizgi baǵyttary:

- quqyqtyq memlekettiń negizi retinde qaýipsiz qoǵam qurý úshin jaǵdaı jasaý;

- azamattardyń ómirin, densaýlyǵyn, múlki men quqyqtaryn qylmystyq qol suǵýshylyqtan qorǵaý;

- qoǵamdyq qaýipsizdikti qamtamasyz etýdiń qoldanystaǵy tetigin ǵylymı derekter men áriptestikke negizdelgen qazirgi zamanǵy aldyn alý júıesine aınaldyrý.

Mınıstrlik ókiliniń aıtýynsha, atalǵan tujyrymdama shet elderdiń úzdik tájirıbesine súıene otyryp ázirlenýde.

«Tujyrymdamada quqyq buzýshylyqtardyń aldyn alý tetikteri qarastyrylady. Qylmystyq ister tek polıtsııa jumysyna ǵana táýeldi emes áreket ekenin eskersek, memlekettik organdardy, ákimdikterdi basqa da múddeli taraptarmen jáne azamattarmen áriptestik ornatý, sondaı-aq qoǵamdyq qaýipsizdik máseleleri boıynsha esep berýdiń ashyq júıesin engizý josparlanýda. Sonymen qatar tujyrymdamada polıtsııa jumysyn transformatsııalaý, bıýrokratııadan aýlaq, adamǵa baǵyttalǵan modelge kóshý jónindegi sharalar bekitiletin bolady», -deıdi vedomstvo ókili.

Tujyrymdaǵa qatysty usynys-pikirlerdi [e-mail] elektrondy poshtasyna jiberýge bolady.