ІІІ Dúnıejúzilik kóshpendiler oıyndaryna Jambyldan 15 sportshy qatysady
«ІІІ Dúnıejúzilik kóshpendiler oıyndaryna baratyn sportshylardy 31 tamyzda shyǵaryp salamyz. Saltanatty shara «Taraz-Arena» sport saraıynda bolady», - dep málimdedi Jambyl oblysy ákimdiginiń sport jáne deneshynyqtyrý basqarmasynyń ókilderi.
ІІІ Dúnıejúzilik kóshpendiler oıyndary 2-8 qyrkúıek aralyǵynda Qyrǵyzstannyń Sholpan ata qalasynda ótedi. 37 ulttyq sport túrinen ótetin dúbirli dodada álemniń 80 elinen jınalǵan úsh myńǵa jýyq sportshy qatysady. Qazaqstannan eki júzge jýyq sportshy barady.
Jambyldyq sportshylar Oıyndardyń jeti jarysynda synǵa túsedi.
Kókpardan - Bolatbek Álimbetov, Esjan Qurmanbaı, Qurmanbek Turǵanbek jáne Meıirjan Matjan; qus salýdan - Jalǵas Ákimbekov pen Baqdáýlet Babajan; asyq atýdan - Erkebulan Ábdirov; qunan báıgeden - Nurahmed Jangýdeev; jamby atýdan - Jarqynaı Rahymbaeva jáne Abzal Turlybekov; armrestlıngten Vıtalıı Trýbın, Oksana Pısmennaıa, Valı Faradjov, Antonına Lısıanskaıa, mas-restlıngten - Altyn Aqylbek qatysady.
Eske salaıyq, Qazaqstan Dúnıejúzilik kóshpendiler oıyndaryna alǵash ret ótkizilgen 2014 jyldan beri qatysyp keledi. Sol joly qazaqstandyqtar 11 altyn, jalpy 28 medal alyp, 18 eldiń arasynda ekinshi oryndy ıelengen bolatyn. 2016 jyly uıymdastyrylǵan ІІ Dúnıejúzilik kóshpendiler oıyndaryna 63 elden myńnan astam sportshy qatysty, olardyń ishinde dástúrli túrde kóshpendi halyq sanalmaıtyn elder de boldy. Qazaqstan sporttyń 22 túrinen 13 altyn, jalpy 39 medal alyp, jalpy esepte úshinshi oryndy qanaǵat etken.
Atalmysh oıyndardyń jabylý saltanatynda Dúnıejúzilik kóshpendiler oıyndaryn ótkizý quqyǵy ózge elge beriledi. Alaıda uıymdastyrýshylar ázirge kelesi oıyndar qaı memlekette ótetinin jarııa etpeı otyr. Buǵan deıin atalmysh shara tek Qyrǵyzstannyń aýmaǵynda ǵana ótkizilgen. Kelesi oıyndardy uıymdastyrýǵa úmitker elderdiń qatarynda Qazaqstan, Ázerbaıjan jáne Túrkııa kósh bastap tur.
