І jartyjyldyqta Indýstrııalandyrý kartasy boıynsha 54 jańa joba ashyldy
Aǵymdaǵy jyldyń І jartyjyldyǵynda Indýstrııalandyrý kartasy boıynsha 54 nysan paıdalanýǵa berildi, dep habarlady pm.kz saıty.
Indýstrııa jáne jańa tehnologııalar mınıstrliginiń aqparatyna súıensek, 2012 jyldyń 5 aıynda óńdeýshi ónerkásiptiktiń ósimi 6,8 paıyzdy qurady. Al mashına jasaý salasyndaǵy óndiris - 16,4 paıyzǵa, farmatsevtıkada - 9,8 paıyzǵa ulǵaıdy. Jeńil ónerkásip salasyndaǵy ósim 11,5 paıyzdy qurasa, metall emes mıneraldyq ónimder óndirisi 7,6 paıyzǵa artty.
Aldyn-ala málimetter boıynsha, Indýstrııalandyrý kartasynyń kásiporyndary ótken 6 aıda 300 mlrd. teńgeniń ónimderin óndirgen jáne aǵymdaǵy jyly 54 jańa óndiris iske qosyldy. Bul kórsetkishter óńirlik ındýstrııanyń ósý dınamıkasyn kórsetedi. Indýstrııalandyrý baǵdarlamasy qolǵa alynǵaly beri respýblıka boıynsha 443 jańa óndiris ashylyp, solardyń arqasynda ekonomıkanyń qurylymy ózgerdi. Qazaqstanda buryn óndirilmegen jańa ónimder shyǵaryla bastady. Olardyń qatarynda tikushaqtar, teńiz qurylǵylary, transformatorlar, munaı-gaz burǵylaý qondyrǵylaryna arnalǵan metall qurylǵylar, farmatsevtıka ónimderi jáne medıtsınalyq jabdyqtar bar.
Sonymen qatar, mashına jasaý salasyndaǵy jalpy qosymsha qun 169,4 paıyzdy qurady, óndiris kólemi 300 mlrd. teńgeden 500 mlrd. teńgege deıin ósti. Al hımııa salasynda joǵary úlesti ónimderdiń eksporty 2010 jylǵy deńgeıden 2 esege artty.
Qurylys ındýstrııasynda jalpy qosymsha qun 160 paıyzdan asty, otandyq qurylys materıaldarynyń úlesi 67 paıyzǵa ósti.
Joǵary tehnologııalyq ónimderdiń eksporty 58 paıyzǵa artty. Oǵan qosa, óńdeý ónerkásibindegi shıkizattyq emes eksporttyń úlesi 2015 jylǵa josparlanǵan kórsetkishten asyp, 70 paıyzdan astamdy qurap otyr.
Aıta ketý kerek, Indýstrııalandyrý baǵdarlamasy iske asyryla bastaǵan 2,5 jyldyń ishinde 300-den astam ınnovatsııalyq joba memlekettik qoldaýǵa ıe boldy. Kásipkerlikti damytýdyń 100-ge jýyq tetigi ázirlendi. Atap aıtqanda, 166 kásiporyn ınnovatsııalyq granttar alsa, óz isterin endi bastaǵan 76 kásiporyn tegin bıznes-ınkýbatsııalaý qyzmetterine ıe boldy, 23 kompanııa óndiristi basqarýdyń aldyńǵy qatarly tehnologııalaryn qolǵa aldy, konstrýktorlyq bıýrolar arqyly mashına jasaý salasy ónimderiniń 12 jańa túri engizildi.
Oǵan qosa, 1,5 myń kásiporyn shıkizattyq emes eksportty qoldaý baǵdarlamasymen qamtylyp, sonyń arqasynda óńdelgen ónimderdiń eksporty 22 mlrd. dollardan asyp otyr.
Indýstrııalyq-ınnovatsııalyq damýdyń arqasynda ÚIID baǵdarlamasy iske asyryla bastaǵan jyldary halyqtyń jumyspen qamtylý qurylymy da sapalyq turǵydan ózgerdi. Jańadan iske qosylǵan jáne jańǵyrtylǵan óndiristerde 100 myńǵa jýyq adam ýaqytsha jáne turaqty jumystarmen qamtyldy.
Qazaqstan Respýblıkasyn údemeli ındýstrııalyq-ınnovatsııalyq damytý jónindegi 2010-2014 jyldarǵa arnalǵan memlekettik baǵdarlamany Úkimet Elbasynyń tapsyrmasy boıynsha iske asyrýda. Baǵdarlamanyń negizgi maqsaty el ekonomıkasyn jedeldetip ártaraptandyrý bolyp tabylady. Qazirgi tańda Indýstrııalandyrý kartasyna jalpy quny 11,4 trln. teńgeniń 706 jobasy kirip otyr. Jobalardyń qurylysy barysynda 218 myńnan astam jumys ornyn, olar iske qosylǵannan keıin 191 jumys ornyn qurý josparlanǵan.
