«Hýtorskıe» toby: Hasan Qasymbaevqa qandaı aıyp taǵylyp otyr
ASTANA. KAZINFORM - Bas prokýratýra Talǵarda adam urlap, uryp-soǵýǵa qatysty isti qaıta qarady, dep habarlaıdy Kazinform.
Bas prokýratýra azamat A.Álimovti urlaý jáne uryp-soǵýǵa qatysty qylmystyq isterdi qaıta qarady. Qylmys 2021 jyldyń 17 maýsymynda Talǵar qalasy Rysqulov kóshesindegi «Vıktorııa» kesheniniń aldynda bolǵan. Belgisiz bireýder jábirlenýshini soqqyǵa jyǵyp, Audi-C4 kóligimen urlap áketti. Ol dene jaraqattarymen ortalyq oblystyq aýrýhanaǵa jetkizildi, dárigerler aldyn ala «bas mıynyń jabyq jaraqaty, mıdyń shaıqalýy jáne eki jaǵynan paraorbıtaldy gematoma» dıagnozyn qoıdy.
Tergeý nátıjesinde qylmysqa qatysy bar tulǵalar anyqtaldy: Qalymjanov M., Aqtanov S., Sultanbekov N., Qýanyshbekov S., Aýkenov Q. jáne Álıev R. Qalymjanov M., Aqtanov S. jáne Álıev R-ǵa qatysty QR Qylmystyq kodeksiniń 293-baby 2-bóliginiń 1-tarmaǵy jáne 125-baptyń 2-bóliginiń 1-tarmaǵy boıynsha qylmystyq is Talǵar aýdandyq sotyna jiberildi. Alaıda olar shartty túrde sottaldy.
Qylmys 2020 jyly Eńbekshiqazaq aýdany Avat aýylynda bolǵan janjaldan keıin kek alý maqsatynda Hasan Qasymbaevtyń nusqaýy boıynsha jasalǵany anyqtaldy. Janjal kezinde atys qarýy qoldanyldy. Eńbekshiqazaq aýdandyq sotynyń úkimimen M.Qalymjanov pen onyń sybaılastary shartty túrde bas bostandyǵynan aıyryldy.
Jańadan ashylǵan mán-jaılarǵa baılanysty prokýratýra QR QK-niń 125-baby («adam urlaý») jáne 106-baby («Densaýlyqqa qasaqana aýyr zııan keltirý») boıynsha qylmystyq is tirkep, ony Almaty oblysy polıtsııa departamentiniń qaraýyna jiberdi.
Eske salaıyq, 4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz.
Ashýly talǵarlyqtar jasóspirim ólimine baılanysty narazylyqqa shyqty.
Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.
Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.
Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi.
Almaty oblystyq polıtsııa departamenti bastyǵynyń mindetin atqarýshy Serik Shalqarov beınebaqylaý kameralarynan alynǵan jazbalar zerttelip jatqanyn jetkizdi.
12 qazan túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
Sondaı-aq Bas prokýratýra qylmysty ashý úshin vedomstvoaralyq jedel-tergeý toby qurylǵanyn málimdedi.
Keıin Іshki ister mınıstriniń birinshi orynbasary Baýyrjan Alenov órt qylmysy boıynsha aıǵaqtar alynyp, tıisti saraptamalar júrgizilip jatqanyn habarlady.
Qoǵamdyq tártipti qadaǵalaý úshin Ulttyq ulan áskeri jumyldyryldy.
15 qazan kúni Talǵar qalasynyń ákimi Bahyt Qýatbekuly Kúrishbekov, Talǵar qalasy ákiminiń orynbasary Matan Saǵyndyq óz mindetterin tıisti deńgeıde atqarmaǵany úshin laýazymdarynan bosatyldy.
Artynsha, Talǵar aýdany ákimi apparatynyń basshysy Aslan Qasymbaev qyzmetinen qýyldy. Al, Talǵar aýdanynyń ákimi Tanat Esenkeldiuly Aıdarbekov jáne onyń orynbasary Aıbek Dúısembekuly Bıdaev sógis aldy.
Іshki ister mınıstrliginiń ókilderi BAQ qyzmetkerlerine Sherzat Bolat qaza tapqan jerde kameraǵa túsip qalǵan vıdeony kórsetti.
Prokýratýra sottyń ashyq ótýin suraıtyndaryn jetkizdi.
Artynsha marqum Sherzat Bolattyń isi boıynsha Almaty oblysynyń birneshe joǵary laýazymdy polıtsııa qyzmetkeri qyzmetinen bosatyldy.
Osyǵan deıin atyshýly Hasan Qasymbaevtyń ustalǵany týraly jazdyq.
