Hýsıtter soǵys bastalǵaly alǵash ret Izraılge soqqy jasady
ASTANA. KAZINFORM - AQSh pen Izraıldiń Iranǵa qarsy soǵysy bastalǵaly bir aı ótken soń alǵash ret Iemen aýmaǵynan Izraılge zymyran ushyryldy, dep habarlaıdy DW.
Izraıl qorǵanys armııasy senbi, 28 naýryz kúni tańerteń Telegram jelisinde áýe qorǵanysy júıesiniń áskerı daıyndyqqa keltirilgenin habarlady.
Izraıl qorǵanys armııasy málimetinshe, zymyran qaǵyp túsirilgen, qaza tapqandar men qıraý faktileri tirkelmegen.
Iemen aýmaǵynda Iran qoldaıtyn radıkaldy-ıslamshyl hýsıtter qozǵalysy áreket etedi. Buǵan deıin olar Tegeranǵa «tolyq ári myzǵymas qoldaý» bildiretinin málimdegen. Sońǵy ýaqytta bul toptyń Iemen aýmaǵynan Iran jaǵynda soǵysqa aralasýy múmkin degen qaýip kúsheıgen edi.
Shabýyl úshin jaýapkershilikti hýsıtter moınyna aldy. Olarǵa jaqyn Al-Masirah telearnasynyń málimetinshe, Izraıldiń ońtústigindegi «mańyzdy áskerı nysandarǵa» ballıstıkalyq zymyrandardan turatyn soqqy jasalǵan. Top sondaı-aq shabýyldardy jalǵastyrý nıetin bildirdi.
Qyzyl teńizdegi qaýip
Hýsıtter buǵan deıin de Qyzyl teńizde jáne oǵan ońtústikten jalǵasatyn Aden shyǵanaǵynda saýda kemelerine birneshe márte shabýyl jasaǵan. Qyzyl teńiz ben Aden shyǵanaǵy álemdegi eń mańyzdy saýda baǵyttarynyń biri sanalady. Olar Soltústik-Shyǵys Afrıka men Arab túbeginiń arasynda ornalasyp, Jerorta teńizi (Sýets kanaly arqyly) men Úndi muhıty (Bab-el-Mandeb buǵazy arqyly) arasyndaǵy negizgi baılanysty qamtamasyz etedi.
Hýsıtter ókili ıAhıa Sarıa 27 naýryz kúni toptyń Iran jaǵynda soǵysqa qosylýǵa daıyn ekenin málimdedi.
The Wall Street Journal basylymynyń jazýynsha, Saýd Arabııasy men AQSh Iemendegi hýsıtterdiń soǵysqa aralasýyna jol bermeýge tyrysyp jatyr.
Basylym derekkózderiniń aıtýynsha, saýdııalyq sheneýnikter qaqtyǵysqa tartpaý úshin hýsıttermen dıplomatııalyq baılanysty saqtaýǵa umtylyp otyr.
- Eger hýsıtter qaqtyǵysqa qosylsa, jaǵdaı kúrt shıelenisedi. Bul Sýets kanaly men Mysyrdy da janjalǵa tartyp, Saýd Arabııasyn odan ári jaqyndata túsedi, — dep keltiredi sarapshylardyń biriniń pikirin The Wall Street Journal.
Osyǵan deıin Izraıl armııasy Tegeranǵa aýqymdy soqqylar jasaǵanyn habarlaǵan bolatyn.