Hrapýnov jekege berip jibergen jedel járdem kesheni memleketke qaıtaryldy

ALMATY. KAZINFORM – Almatyda jekeniń qolyna ótip ketken jedel járdem kesheni memleketke qaıtaryldy. 

Qalalyq prokýratýranyń málimetinshe, atalǵan nysannyń jalpy quny – 3 mlrd teńge.

«Almaty qalasy mamandandyrylǵan aýdanaralyq ekonomıkalyq sotynyń byltyr qarasha aıyndaǵy sheshimimen, qala prokýrorynyń memlekettik múlikti jeke menshikke berý jónindegi áreketterdi zańsyz dep taný týraly talap-aryzy qanaǵattandyrylyp, sot sheshimi zańdy kúshine endi», - dep atap ótti prokýratýradan.

Aýdany 3974 sharshy metr jáne 50 sotyq jeri bar bul keshendi Almaty qalasynyń burynǵy ákimi V. Hrapýnov jeke qurylymdarǵa zańsyz bergen.

Qazirgi ýaqytta jyljymaıtyn múlik, qala ákiminiń qaýlysymen jedel medıtsınalyq járdem qyzmetiniń balansyna berildi, qosymsha qosalqy stantsııa ashý josparda bar.