Hosteldegi órt oqıǵasy: Sottalýshynyń áıeli málimdeme jasady
ALMATY. KAZINFORM – Almatyda 13 adam ólim qushqan hosteldegi órt boıynsha sot otyrysy jalǵasyp jatyr.
Іs Almaly aýdandyq sotynda sýdıa Ernar Qasymbekovtiń tóraǵalyǵymen qaralyp jatyr. QR Qylmystyq kodeksiniń 292-babynyń 3-bóligi (Abaısyzda eki nemese odan da kóp adamnyń ólimine ákep soqqan órt qaýipsizdigi talaptaryn buzý) boıynsha eki adamǵa aıyp taǵylyp otyr. Olar – Ádilbek Muhamedıarov pen Aleksandr Pekelnık.
Kezekti sot otyrysynda sottalýshy Ádilbek Muhamedıarovtyń jubaıy Botagóz Muhamedıarova málimdeme jasady.
«Meniń joldasym jaldaý shartyn jasaý kezinde ózinen jasyrylǵan jalǵan málimdemeler men kemshilikterdiń qurbany boldy. Biz Krysha kz -ten úı-jaıdy jalǵa alý týraly habarlandyrýdy tapqanda, onyń kez kelgen qyzmet túrine, sonyń ishinde hostel ashýǵa da jaramdy ekeni jazylǵan. Biz «Qusa halyq» JShS qyzmetkerimen kezdestik, ol bizge jalpy aýdany 457 sharshy metr bolatyn bólmeni usyndy birinshi qabatta bar bolǵany úsh bólme, al jertólede alty bólme bolǵan», - deıdi ol.
Botagóz Muhamedıarovanyń aıtýynsha, sarapshynyń qorytyndysyna sáıkes, órtke syrtqy ashyq ot kózinen janǵysh matratstardyń tutanýy sebep bolǵan: sóndirilmegen temeki, ottyq jáne taǵy basqalary.
«Sarapshy órttiń elektr symdarynyń qysqa tuıyqtalýynan bolǵanyn joqqa shyǵarady, alaıda bul saraptamanyń qorytyndysyn sotqa deıingi tergeý organy esepke almaǵan», - dedi Botagóz Muhamedıarova.
Sondaı-aq sottalýshynyń áıeli sotqa deıingi tergeý barysynda qasaqana órteý deregi boıynsha qylmystyq is qozǵalǵanyn atap ótti.
«Órt shyqqan kezde hostelde bolǵan kúdiktilerdiń biri E. esimdi azamat, ol qaıǵyly jaǵdaı bolǵan túnde hostelge 15 mınýtqa kirgen. Ot tutanǵanda alǵashqylardyń bir bolyp qashyp shyqqan. Munyń bári «Sergek» kameralaryna túsip qaldy. Aıta keteıin ol buǵan deıin urlyq jasaǵany úshin sottalǵan», - dedi ol.
Osyǵan deıin prokýror Nurazhan Myrzaly aıyptaý aktisin oqyǵan bolatyn.
Prokýrordyń sózinshe, aıyptalýshy Muhamedıarov ǵımarattyń fýnktsıonaldyq maqsatyn ózgertip, jóndeý jumystaryn júrgizgen. Sonymen qatar jalǵa alýshy ol jerde órt qaýipsizdigi talaptaryn saqtamaǵan. Dálizge tósekter ornalastyryp, birinshi qabattaǵy evakýatsııalyq esikti jıhazdarmen jaýyp tastaǵan. Sondaı-aq jertóleniń avarııalyq shyǵý esikterin bekitip qoıǵan.
Pekelnık órtten qorǵaý júıelerin jobalaýǵa qajetti lıtsenzııasynyń joqtyǵyna qaramastan, qoldanystaǵy dabyl júıesin vızýaldy tekserip, dıagnostıka júrgizgen. Biraq ol bólmelerdiń fýnktsıonaldyq maqsattary men erekshelikterin eskermedi.
Eske salaıyq, 2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtengen bolatyn.
Tótenshe jaǵdaı departamentine órt týraly habarlama 05:33-te túsken. Órt saldarynan hostelde 13 adam qaıtys boldy.
Mert bolǵan 13 adamnyń tórteýi – sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy – Qazaqstan Respýblıkasynyń azamattary.
Keıinirek órtengen hosteldiń ıeleri belgili boldy.
Hostel ǵımaraty Halyk Bank-ke tıesili. Ony jalǵa alǵan – «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan.
Byltyr jeltoqsan aıynda hosteldiń basshysy ustaldy.
2024 jyldyń qyrkúıek aıynda Almaty qalasynyń prokýratýrasy hosteldegi órtke baılanysty tergeýdiń aıaqtalǵanyn habarlady.
Osyǵan deıin alǵashqy sot otyrysy ótkeni týraly jazǵan edik.
