Hosteldegi órt oqıǵasy: sottalýshy úıqamaqqa aýystyryldy

ALMATY. KAZINFORM — Almatyda 13 adam ólim qushqan hosteldegi órtke qatysty aıyptalyp otyrǵan ALA Hostel dırektory Ádilbek Muhamedıarovqa qatysty bultartpaý sharasy jeńildetilgen túrine ózgertildi.

Іs Almaly aýdandyq sotynda qaralyp jatyr. ALA Hostel dırektory Ádilbek Muhamedııarov pen «Gıdservıs» kompanııasynyń ıesi Aleksandr Pekelnıkke QR Qylmystyq kodeksiniń 292-baby 3-bóligi (Órt qaýipsizdigi talaptaryn buzý, abaısyzda eki nemese odan da kóp adamnyń ólimine ákelý) boıynsha aıyp taǵylǵan.

Kezekti sot otyrysynda sýdıa Ernar Qasymbekov Ádilbek Muhamedıarovqa qatysty bultartpaý sharasyn neǵurlym jeńil – úıqamaqqa ózgertý týraly sheshim shyǵardy. 

Onyń aıtýynsha, protsess alty aıdan beri jalǵasyp keledi. QR Qylmystyq-protsestik kodeksiniń 342-babyna sáıkes, eger ortasha aýyr qylmysqa qatysty aıyptalýshy alty aıdan astam ýaqyt qamaýda otyrsa, sot bultartpaý sharasyn úıqamaqqa nemese basqa jeńil sharaǵa ózgertýge mindetti.

Osyǵan deıin prokýror Nurazhan Myrzaly aıyptaý aktisin oqyǵan bolatyn.

Eske salaıyq, 2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtengen bolatyn.

Tótenshe jaǵdaı departamentine órt týraly habarlama 05:33-te túsken. Órt saldarynan hostelde 13 adam qaıtys boldy. 

Mert bolǵan 13 adamnyń tórteýi – sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy – Qazaqstan Respýblıkasynyń azamattary.

Keıinirek órtengen hosteldiń ıeleri belgili boldy. 

Hostel ǵımaraty Halyk Bank-ke tıesili. Ony jalǵa alǵan – «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan.