Hokkeıden el birinshiliginde «Torpedo» jeńisti jolyn jalǵastyrdy

ASTANA. KAZINFORM — Shaıbaly hokkeıden Qazaqstan chempıonatynda kezekti oıyn kúni máresine jetti.

Kósh basynda kele jatqan óskemendik «Torpedo» bul joly da súringen joq. Qatarynan toǵyz márte jeńiske jetken olar kezdesý barysynda rýdnyılyq «Gornıakty» 4:1 esebimen tize búktirdi. Óskemendik komanda 5 qazanda atalǵan qarsylasyn 4:2 esebimen jeńgen edi.

Taǵy bir kezdesýde qaraǵandylyq «Saryarqa» petropavldyq «Qulagerdi» 6 qazanda 5:1 esebimen jeńse, olar bir kún buryn atalǵan qarsylasyn 4:2 esebimen qapy qaldyrǵan edi.
Al astanalyq «Nomad» «Aqtóbeni» eki oıynda 5:0, 4:2 esebimen tize búktirdi.

Aıta ketsek, budan buryn óskemendik «Torpedo» shaıbaly hokkeıden 2025 jylǵy Qazaqstan kýbogynyń ıegeri atandy.

Fınaldyq oıynda olar Qaraǵandynyń «Saryarqa» komandasynan 4:1 esebimen basym tústi. Nátıjesinde kýbokty tóbesine kóterdi.

Toptyq kezeńde komandalar Óskemen jáne Qaraǵandy qalalarynda sheberlik baıqasty. Toptyq kezeńnen keıin jartylaı fınal oıyndary jalǵasty. Onda topta birinshi oryn alǵan komandalar ekinshi toptaǵy ekinshi oryndaǵy ujymdarmen fınal joldamasyn sarapqa saldy.

Eske salsaq, budan buryn «Barys» overtaımda «Sıbır» komandasynan jeńilip qaldy.