«Haı-tek» operatsııasy: Qylmystardyń basym bóligin ınternet-alaıaqtyq quraıdy
«Ótken aptada aqparattandyrý jáne baılanys salasyndaǵy, sondaı-aq aqparattyq tehnologııalardy, onyń ishinde ınternet-alaıaqtyǵyna qatysty qylmystardyń aldyn alýǵa jáne ashýǵa baǵyttalǵan «Haı-tek» operatsııasy ótkizildi. Atalǵan is-sharanyń úsh kúni ishinde ınternet-paıdalanýshylardy aldaýdyń kóptegen faktisi anyqtaldy», - dedi Nurdildá Oraz Іshki ister mınıstrliginde ótken baspasóz máslıhaty barysynda.
Máselen, elordalyq polıtseıler azamattardy ınternet jelisinde joq páterdi jalǵa berý týraly habarlandyrý arqyly aldaǵan alaıaqty ustady. Jalpy somasy 300 myń teńgege materıaldyq shyǵyn shekken 8 jábirlenýshi anyqtaldy. Sondaı-aq ózgelerdiń derbes derekterin paıdalana otyryp, mıkroqarjy uıymdarynda onlaın-kredıtter rásimdeýmen aınalysqan Qostanaı qalasynyń eki turǵyny qolǵa tústi. Jedel is-sharalar barysynda qosymsha 15 jábirlenýshi anyqtaldy. Keltirilgen zalaldyń jalpy somasy shamamen 2 mln teńgeni quraıdy.
«Osyndaı syzba arqyly Jarkent qalasynan kelgen eki alaıaq azamattardy aldady. Olar jyl basynan beri onlaın-qaryzdar rásimdeý arqyly aqsha urlady. Materıaldyq zalal 2 mln 470 myń teńgeni qurady. Almaty qalasynyń turǵyny «Olh.kz» saıtyna jalǵan habarlandyrýlar ornalastyryp, júk tasymaldaý qyzmetterin usyný arqyly aqsha tapaqshy bolǵan. Qazirdiń ózinde 1 mln teńgege jýyq somaǵa zardap shekken 6 jábirlenýshi anyqtaldy. Basqa aldanǵan adamdardy anyqtaý úshin is-sharalar qabyldanýda», - dedi ol.
Sonymen qatar resmı ókil Almaty qalasynda arnaıy tehnıkalyq quraldardy zańsyz satqany úshin qala turǵyny ustalǵanyn aıtty. Odan baqylaý satyp alý barysynda tyńdaý múmkindigi bar 3 GSM treker tárkilendi. Tekserý júrgizilýde. Jalpy, «Haı-tek» jedel aldyn alý is-sharalaryn ótkizý kezinde respýblıka aýmaǵynda barlyǵy 214 quqyq buzýshylyq ashyldy. Olardyń basym bóligin ınternet-alaıaqtyq quraıdy.
«Sondaı-aq, Avtorlyq jáne sabaqtas quqyqtardy buzýdyń 2 faktisi, Internet jelisinde pornografııalyq materıaldardy taratýdyń 8 faktisi jáne aqparattyq tehnologııalardy paıdalana otyryp jasalǵan qylmystyq quqyq buzýshylyqtardyń ózge 14 faktisi tirkeldi. Barlyq materıaldar boıynsha sotqa deıingi tergeý amaldary júrgizilýde», - dedi Nurdildá Oraz.
