Hasan Qasymbaevtyń advokattary sot úkimine shaǵym túsirmek

QONAEV. KAZINFORM – Hasan Qasymbaevtyń advokattary sot úkimimen kelispeı otyr, olar apellıatsııalyq shaǵym túsirmek.

Qorǵaýshylar Narıman Kervenov pen Gúlmıra Babajanovanyń aıtýynsha, Qasymbaevtyń kinási dáleldenbegen, alaıda sot aıyptaý úkimin shyǵarǵan.

— Jábirlenýshilerdiń biri Hasanǵa eshqandaı shaǵymy joq ekenin aıtyp, ony keshirgenin aıtty. Alaıda sot muny eskermedi. Arman Álimov isi boıynsha buǵan deıin úsh sot ótken. Bul — tórtinshi protsess. Qalǵan bes aıyptalýshy óz jazasyn ótep jatyr, al bul joly is qaıta qaralyp, oǵan Hasandy qosty. Tájıev isi 2016 jyly, Álimov isi 2021 jyly bolǵan. Qasymbaev shynymen kináli bolsa, tergeý sol kezde bastalýy kerek edi ǵoı, — dedi advokat Gúlmıra Babajanova.

Onyń sózinshe, tergeý kezinde kóptegen zańbuzýshylyq bolǵan, al sot protsesinde «beıtaraptyq saqtalmady».

— Bes kúnnen keıin úkimniń tolyq mátinin alamyz. Ýaqytymyz bar, mindetti túrde apellıatsııalyq shaǵym túsiremiz, — dedi ol.

Advokat Narıman Kervenovtiń aıtýyna qaraǵanda, jábirlenýshi Áripjan Tájıevke qatysty epızod buryn qaralyp, is toqtatylǵan, alaıda keıin arhıvten qaıta alynǵan.

— 2016 jyly Tájıev isi boıynsha is basqa adamdarǵa qatysty bolǵandyqtan toqtatylǵan. Byltyr ony arhıvten shyǵaryp, qaıta qozǵady. Sol kezde qylmystyq isten 16 bet materıal joǵalyp ketken, onyń ishinde Tájıevtiń tatýlasý týraly aryzy men bapty qaıta saralaý jónindegi ótinishi de bar edi. Bul qujattar qazir joq, — dedi ol.

Kervenov qorǵaý taraby 15 kún ishinde apellıatsııalyq shaǵym túsiretinin jáne qajet bolsa, kassatsııalyq satyǵa deıin baratynyn aıtty.

— Qandaı negizben kináli dep tanylǵany ázirshe belgisiz. Sýdıa úkimniń tek sheshýshi bóligin oqydy. Tolyq mátindi alǵan soń, sot nege mundaı qorytyndy shyǵarǵanyn taldaımyz, — dedi advokat.

Eske salaıyq, búgin, 11 qarashada Talǵar aýdandyq soty Hasan Qasymbaevty adam urlaý, densaýlyqqa qasaqana aýyr zııan keltirý jáne qorqytyp aqsha bopsalaý isi boıynsha kináli dep tanydy.

Sot oǵan 12 jyl bas bostandyǵynan aıyrý jazasyn taǵaıyndady.

Sonymen qatar is boıynsha taǵy bes adamǵa úkim shyqty.