Hasan Qasymbaevqa qatysty tergeý aıaqtaldy ma

ALMATY. KAZINFORM – «Hýtorlyqtar» atty uıymdasqan qylmystyq toptyń jetekshisi dep tanylǵan Hasan Qasymbaevqa qatysty tergeý qashan aıaqtaldy.

Buqaralyq aqparat quraldarynda Hasan Qasymbaevqa qatysty tergeý aıaqtalyp, sotqa joldanǵany týraly aqparat tarap jatyr.

Alaıda Kazinform agenttigi joldaǵan saýalǵa jaýabynda Almaty oblystyq Polıtsııa departamenti ony joqqa shyǵardy.

– Birqatar BAQ-ta Hasan Qasymbaev jáne basqa da tulǵalarǵa qatysty qylmystyq istiń sotqa joldanǵany týraly shyndyqqa sáıkes kelmeıtin aqparat jarııalandy. Atalǵan qylmystyq is boıynsha tergeý aıaqtalyp, qazirgi ýaqytta is materıaldary taraptarǵa tanysý úshin usynylǵan. Tanysý protsesi aıaqtalǵannan keıin is aıyptalýshylardy sotqa berý máselesin sheshý úshin prokýratýraǵa joldanady, - dep habarlady Almaty oblystyq Polıtsııa departamentiniń baspasóz qyzmetinen. 

Oblystyq sot ókilderi is materıaldary sotqa túspegenin málimdedi.

Eske salaıyq, byltyr qarasha aıynda Hasan Qasymbaev qamaýǵa alynǵan bolatyn.

Buǵan deıin 16 jastaǵy Sherzat Polattyń óliminen keıin talǵarlyqtar ony «Hýtorskıe» tobynyń basshysy bolýy múmkin ekenin aıtqan edi. 

Keıin Іshki ister mınıstriniń birinshi orynbasary Baýyrjan Álenov kásipker Hasan Qasymbaevqa qatysty túsinik berdi.

Sondaı-aq Bas prokýratýra Talǵarda adam urlap, uryp-soǵýǵa qatysty isti qaıta qarady. 

Almaty oblystyq polıtsııa departamentiniń baspasóz qyzmeti kúdiktigi qatysty taǵy qandaı aıyp taǵylǵany týraly aqparat taratty.