«Hantalapaı» saıysyna 350 myńnan astam bala qatysty

ASTANA. KAZINFORM — Naýryz meıramyna oraı dástúrli túrde uıymdastyrylatyn mektep jasyna deıingi balalarǵa arnalǵan «Hantalapaı» ulttyq oıyndar respýblıkalyq baıqaýy qorytyndylandy.

Bıylǵy baıqaýǵa elimizdiń túkpir-túkpirinen 350 myńnan astam bala qatysty.

Іs-sharanyń basty maqsaty – balalardyń ulttyq oıyndarǵa qyzyǵýshylyǵyn arttyryp, qazaq halqynyń mádenı murasy men salt-dástúrine degen qurmet sezimin qalyptastyrý. Baıqaýǵa ortańǵy, eresek jáne mektepaldy top tárbıelenýshilerimen qatar pedagogter men ata-analar da belsendi túrde atsalysty.

Oıyndar qaýipsizdik talaptary saqtalǵan, ulttyq naqyshta bezendirilgen arnaıy alańdarda ótti. Qatysýshylar «Asyq atý», «Hantalapaı», «Toǵyzqumalaq», «Taqııa tartys», «Láńgi», «Bes tas», «Sadaq atý», «Kókpar», «Qamshy tastamaq» syndy qazaqtyń dástúrli oıyndaryn oınap, eptilik pen shapshańdyqtaryn synady. Keıbir oıyndar zamanaýı formatta usynylyp, ústel ústi nusqalary da engizildi.

Baıqaýǵa ata-analar qaýymdastyǵy da keńinen tartyldy. Olar pedagogtermen birge balalarǵa ulttyq oıyndardyń tárbıelik mánin, densaýlyqqa paıdasyn túsindirip, dástúrli qundylyqtardy dáripteýge úles qosty.

Saıys qorytyndysynda úzdikter birneshe nomınatsııa boıynsha marapattaldy. Atap aıtqanda, «Júzden júırik, myńnan tulpar», «Altyn saqa», «Úzdik uıymdastyrylǵan ulttyq oıyn», «Belsendi oıynshylar», «Tapqyrlar men eptiler» jáne «Úzdik oıyn alańy» atalymdary boıynsha jeńimpazdar anyqtaldy.

«Hantalapaı» baıqaýy ulttyq oıyndardy jańǵyrtýǵa baǵyttalǵan iri joba retinde balalardyń qyzyǵýshylyǵyn arttyryp qana qoımaı, ult murasyn keńinen nasıhattaýǵa serpin berdi.

Aıta ketelik keshe Pavlodar oblysynyń 20 myń oqýshysy «Qara jorǵa» bılegen edi.